مەحبووب جافان
از کتاب:
دیوانی وەلی دێوانە
اثر:
ولی دیوانه (1826-1881)
1 دقیقه
610 مشاهده
مەحبووب جافان، مەحبووب جافان
مەحبووب بێعەیب تایفەی جافان
سەرقەتار ڕەم عەنبەربۆ نافان
سەرکێش ڕەوێڵ مشکین کڵافان
ئاهووی مودبرماس مەکان نەهەردە
چووزەی سونبوڵچر نەسا سڵ کەردە
خاوێر خاڵدار خەتاو خۆتەن ماڵ
تەتار تایف شۆخ شیرین خاڵ
وەتەن نە زامن سەربەرز لێڵاخ
سەیر سەرکۆان سەییادان و داخ
چەرخ چەم سیاچەم چوست و چالاک پڕ
شەیدای شکاردۆز چنگ و هووناو بڕ
لاچین شەشدانگ سەحەر جە لان خێز
شمقار تێژباڵ تەیر توندگورێز
شەمع شا پەسەند گشت سیاماڵان
نام تۆ نە بەزم خەسرەوان خوانان
بەو شەوق جەمین شەم ڕوخسارەوە
کێت نەدا وە دەم کزەی نارەوە؟
بەو قاش قەتران دڵ پێ ئێشاوە
ستوون یانەی کێت نەکێشاوە؟
بەو دیدەی سای سورمەسای سێوەنگ
موژانت وە هوون کێ نەکەردەن ڕەنگ؟
بەو نیمنیگای ناز بەو لەنجەو لارە
ئاخر جەرگ کێت نەکەردەن پارە
بەو باڵای نەوتووڵ وە نەورەستەوە
بەو کۆکۆی کڵاف دەستە دەستەوە
واچە دڵ کێت نەستانان وە زوور
ئاخر یانەی کێت نەکەردەن خاپوور