قیبلەم مەلال بۆ
از کتاب:
دیوانی وەلی دێوانە
اثر:
ولی دیوانه (1826-1881)
1 دقیقه
527 مشاهده
قیبلەم مەلال بۆ، قیبلەم مەلال بۆ
دڵێ غەیر جە خەم خاڵت مەلال بۆ
ئەو دڵ ئەر دانەی شەوچرای لاڵ بۆ
تۆ خودا بازەش با وە زوخاڵ بۆ
دیدەم دیدەێی نەوێنۆ باڵات
هەردەم نەڕژیۆ وە گەرد پاڵات
ئەو دیدە دیدەی جەیر توندخێز بۆ
تۆ خودا بازەش با سۆما بێز بۆ
سەرێ وە سەر کەمان هەر ڕۆ
شەوان سەر نەدۆ وە ئاستانەی تۆ
ئەو سەر ئەر سەردار دەوران دوون بۆ
تۆ خودا بازەش با سەرنگوون بۆ
دەسێ دەس نەدۆ نە کەمەر پەیوەس
نەشۆت نە گەردەن پەیاپەی دەس دەس
ئەو دەسە ئەر دەس جەللاد مۆڕ بۆ
تۆ خودا بازەش با بەستەی گۆڕ بۆ
پاێی پەی پەیڕەو تۆ نەبۆ وە پا
وە ڕای یانەی تۆ نەشۆ وە ڕاڕا
ئەو پا ئەر پای پاک بەدر مونیر بۆ
تۆ خودا بازش با نە زەنجیر بۆ
قیبلەم با دەسم وە دامانت بۆ
مەجزووب جە زومرەی غوڵامانت بۆ