قیبلەم شەم مەبۆ
از کتاب:
دیوانی وەلی دێوانە
اثر:
ولی دیوانه (1826-1881)
2 دقیقه
996 مشاهده
قیبلەم شەم مەبۆ، قیبلەم شەم مەبۆ
مەر هەر کەس چون تۆ نامش «شەم» بۆ
جەمینش چون بەدر دووهەفتەم مەبۆ
پەروانەش خەریک خار خەم مەبۆ
مەر هەر کەس باڵاش سەوڵ ساف مەبۆ
گێسووش پڕ جە عەتر موشک ناف مەبۆ
سەردار ڕەندان ئێڵ جاف مەبۆ
چون تۆ بێ مروەت بێ ئینساف مەبۆ
چون تۆ شەکەر لەب غونچە دەم مەبۆ
پەروانش خەریک خار خەم مەبۆ
مەر هەر کەس ئەبرۆش چون کەمان مەبۆ
زوڵف و خاڵ سێوەنگ چەم قەتران مەبۆ
وێنەی تۆ فیتنەی ڕووی زەمان مەبۆ
وێنەی تۆ بێڕەحم بێئەمان مەبۆ
بێشەرت و بێبەین مۆبەت کەم مەبۆ
پەروانەش خەریک خار خەم مەبۆ
هەر کەس پێشانیش پڕ جە نوور مەبۆ
ساق و گەردنش چون بلوور مەبۆ
مەلایک تەلعەت نەسڵ حوور مەبۆ
بێپەروا جە ڕای «خودا» دوور مەبۆ
چون تۆ دەلیلەی لوای ڕەم مەبۆ
پەروانەش خەریک خار خەم مەبۆ
مەر هەر کەس چون تۆ لیمۆش کاڵ مەبۆ
سینەی سەدەف تا بووم لاڵ مەبۆ
ناف ناف غەزاڵ خوتەن ماڵ مەبۆ
نازار باوان چاردەساڵ مەبۆ
چون تۆ مۆبەتش مەردوم کەم مەبۆ
پەروانەش خەریک خار خەم مەبۆ
مەر هەرکەس وەش بۆش سا چون لەیل مەبۆ
موژانش نەگەرد سورمە کەیل مەبۆ
هەزار کەس نە ڕاش سەرتوفەیل مەبۆ
ناشی و نەزانحاڵ هەر بێ مەیل مەبۆ
شەوقش بە وێنەی سپی شەم مەبۆ
پەروانەش خەریک خار خەم مەبۆ