qîblem şem mebo
From the Book:
Dîwanî Welî Dêwane
By:
Wali Dewane (1826-1881)
2 minutes
948 views
qîblem şem mebo, qîblem şem mebo
mer her kes çun to namş «şem» bo
cemînş çun bedir dûheftem mebo
perwaneş xerîk xar xem mebo
mer her kes bałaş sewł saf mebo
gêsûş piř ce ’etir muşk naf mebo
serdar řendan êł caf mebo
çun to bê mirwet bê însaf mebo
çun to şeker leb ẍunçe dem mebo
perwanş xerîk xar xem mebo
mer her kes ebroş çun keman mebo
zułf û xał sêweng çem qetran mebo
wêney to fîtney řûy zeman mebo
wêney to bêřeḧim bê’eman mebo
bêşerit û bêbeyn mobet kem mebo
perwaneş xerîk xar xem mebo
her kes pêşanîş piř ce nûr mebo
saq û gerdinş çun bilûr mebo
melayk tel’et nesił ḧûr mebo
bêperwa ce řay «xuda» dûr mebo
çun to delîley lway řem mebo
perwaneş xerîk xar xem mebo
mer her kes çun to lîmoş kał mebo
sîney sedef ta bûm lał mebo
naf naf ẍezał xuten mał mebo
nazar bawan çardesał mebo
çun to mobetiş merdum kem mebo
perwaneş xerîk xar xem mebo
mer herkes weş boş sa çun leyl mebo
mujanş negerd surme keyl mebo
hezar kes ne řaş sertufeyl mebo
naşî û nezanḧał her bê meyl mebo
şewqiş be wêney sipî şem mebo
perwaneş xerîk xar xem mebo