ڕیسوای زەمانەم
از کتاب:
دیوانی وەلی دێوانە
اثر:
ولی دیوانه (1826-1881)
2 دقیقه
973 مشاهده
ڕیسوای زەمانەم، ڕیسوای زەمانەم
«قەیسشخص» قەدیمی ڕیسوای زەمانەم
«پەروانە»ی پەشێو سەحرای وێرانەم
عەبداڵ بەڕگێڵ بێزار جە یانەم
«جوغد» خانە چۆڵ شەوان بێ خاوم
تەن تەنیای مەلوول دیدە لێڵاوم
هەراسان نە دیەی دیدەی یارانم
دیدەوان دەیر سەر دیارانم
بێزار جە زامەن بێزیای دۆسم
شەو تا ڕۆ نە فکر کەدو کەڵپۆسم
عەسای خەم وە دەس «خەمر» خەم نۆشم
لێوەی لەنگ لاڵ لۆنگ خەم پۆشم
سزای ستەم کێش سیاستارەم
«فەرهاد» کۆکەن مەنزڵ مەغارەم
ڕای شەشدەر وە بەخت سیا دەربەستەم
پەشیمان جە گشت پەشێو حاڵ جەستەم
جفت چەمیدە چەرخ چەپگەردم
دەردەدار سەخت دوور جە هامدەردم
«تەن» سیاچڵۆسک سەردیارانم
سفتەی شەماڵ گڕ کۆی ئایرانم
دڵ ئازوردەی زوڵم زەمانەی زشتم
چەرخ کەمان پشت شکەستەن پشتم
شەو دیدە بێخاو ڕۆ بێقەرارم
گرفتار جەور ڕۆی ڕۆزگارم
بێزیا جە ژین ڕازی وە مەرگم
سەد جار نێش خار هجران بە جەرگم
چەمەڕای خێڵان ڕیسوای هۆزانم
بە ئاهر عەشق شەخسی سۆزانم
گرۆی وەحشیان بیابان گێڵم
«قەیس» تانەکێش بینایی لێڵم
دڵ پەروانەی عەشق شەم ڕوخسارێکم
پێکیای پەیکان دیدەی یارێکم
«حاتەم» خەیاڵێ قاتەن نە بارەم
بزانۆ وە حاڵ دەرد بێچارەم
چون نەوفەل بەیۆ نە ماوای هەردان
باوەڕۆمەوە وە لای هامدەردان
بەڵێ جە وەسواس شەیتانی دوور بۆ
چون حاتەم خاتر خوداش مەنزوور بۆ
گوشاد کەرۆ دڵ خەمناک خەستەم
شاد کەرۆم بە وەسڵ ئەو ئاوات وەستەم
مەر مەولای غەمخوار بسازۆ کارم
وەرنە بەردابەرد ڕۆی ڕۆزگارم