řîsway zemanem
From the Book:
Dîwanî Welî Dêwane
By:
Wali Dewane (1826-1881)
2 minutes
1019 views
řîsway zemanem, řîsway zemanem
«qeysPerson» qedîmî řîsway zemanem
«perwane»y peşêw seḧray wêranem
’ebdał beřgêł bêzar ce yanem
«cuẍd» xane çoł şewan bê xawim
ten tenyay melûl dîde lêławim
herasan ne dyey dîdey yaranim
dîdewan deyr ser dyaranim
bêzar ce zamen bêzyay dosim
şew ta řo ne fikir kedu kełposim
’esay xem we des «xemir» xem noşim
lêwey leng lał long xem poşim
sizay sitem kêş syastarem
«ferhad» koken menził meẍarem
řay şeşder we bext sya derbestem
peşîman ce gişt peşêw ḧał cestem
cifit çemîde çerx çepgerdim
derdedar sext dûr ce hamderdim
«ten» syaçłosk serdyaranim
siftey şemał giř koy ayranim
dił azurdey zułim zemaney ziştim
çerx keman pişt şikesten piştim
şew dîde bêxaw řo bêqerarim
giriftar cewr řoy řozgarim
bêzya ce jîn řazî we mergim
sed car nêş xar hicran be cergim
çemeřay xêłan řîsway hozanim
be ahir ’eşq şexsî sozanim
giroy weḧşyan byaban gêłim
«qeys» tanekêş bînayî lêłim
dił perwaney ’eşq şem řuxsarêkim
pêkyay peykan dîdey yarêkim
«ḧatem» xeyałê qaten ne barem
bizano we ḧał derd bêçarem
çun newfel beyo ne maway herdan
baweřomewe we lay hamderdan
bełê ce weswas şeytanî dûr bo
çun ḧatem xatir xudaş menzûr bo
guşad kero dił xemnak xestem
şad kerom be wesił ew awat westem
mer mewlay ẍemxiwar bisazo karim
werne berdaberd řoy řozgarim