جەی شۆلەی «شەم»ە
از کتاب:
دیوانی وەلی دێوانە
اثر:
ولی دیوانه (1826-1881)
2 دقیقه
1384 مشاهده
جەی شۆڵەی «شەم»ە، جەی شۆڵەی «شەم»ە
ئەی بارەکەڵڵا جەی شۆڵەی «شەم»ە
جەی نوور مونیر چەرخ چوارەمە
جەی شەوق جەماڵ مای دوو هەفتەمە
جەی تاق میحراب ئەبرۆ کەمانە
جەی مەودای موژگان مەست قەترانە
جەی سیم «ئەنف» ئەلف نگارە
جەی گۆنای گوڵبێز گوڵ و گوڵزارە
جەی زوڵف کەمەند دڵان پێ گیرە
جەی حەڵقەی تەناف گێسوو و زەنجیرە
جەی لەعل لەبان پڕ جە گەوهەرە
جە ڕاز ڕازان ڕێزەی شەکەرە
جەی چای زەنەخدان شێوە شیرینە
جەی «زنج» زیبای تۆپ زێڕینە
جەی مینای بلوور مەملوو جە بادە
جەی ساقی گەردەن سوراحی سادە
جەی نیمنیگای ناز ئەو نازفرۆشە
جەی گۆشواران ئاوێزای گۆشە
جەی جفت قەندیل چەمان جە نوورە
جەی سەدر سینەی سفید بلوورە
جەی سام سەنگین ئی سام سەنگینە
جەی «ساعد» سیم پەنجە ڕەنگینە
جەی ڕام خاو ڕەفت غەزاڵە
جەی «کەتف» و «کەمەر» ئاهووی بەرماڵە
جەی «چەم» غەزەب شیرین نگارە
جەی «ناف» مشکین ئاهوو تەتارە
ڕوو تەرح تەسویر سەنعان کەرد جە دین
وەڵڵا مەر شێوەی گوڵئەندام چین
چەن ئەییام سەردار سەوڵان تەڕ بۆ
ئەسپەردەی ئیمام زامن خەبەر بۆ