بووکی دونیا شوو بە مێردی جاهیل و ئەحمەق ئەکا
از کتاب:
دیوانی سابیری
اثر:
صابری (1881-1944)
2 دقیقه
786 مشاهده
بووکی دونیا شوو بە مێردی جاهیل و ئەحمەق ئەکا
حەقیەتی بێزوو بە خوێنی جەرگی ئەهلی حەق ئەکا
وا جەهەننەم پڕ لە جاهیل لەهو و لەعبی خۆی ئەکا
تێگەیشتوو بۆچ لە ژێر عاباوە خۆی ئیرەق ئەکا
ئەی دریغ ئێستاکە ئەهلی حەق نەما ئەولادییان
غەیبەتی دینپەروەران و کردەوەی ناحەق ئەکا
عالیم و جاهیل لە مەعنا و سورەتا فەرقی نەما
چونکە هەردووکی بە بۆیاغی سمێڵی دەق دەکا
هەر موسوڵمانێ قسەی حەق گەر لە جێگایێ بکا
جێبەجێ لەو جێگە خۆی بێ حورمەت و جێ لەق دەکا
واعیزێ وەعزی بدا زاڵم وەکوو کتکی قەڵەو
گۆشتی دابەستوو ببینێ چاوی هەردوو زەق دەکا
خوانەخواستە عالمێ تەعزیری جاهیلێ بکا
ئەو مەلا تووشی بەڵا و خۆی کافری موتڵەق ئەکا
ئەی مەلا تۆ چۆلەکەی، زاڵم پشیلەی مەتبەخە
تۆ نەچیتە مەتبەخی، چاوی لە تۆ کەی زەق ئەکا؟
حەق وتن قانوون نییە، ناحەق وتن بێ شەرعییە
شەققی شەففە سادق و کازب نزیکی شەق دەکا
تۆ دەل و بیبەر نەخۆی تەئسیر لە داوێنت نەکا
لاجەرەم سیرخۆر ڕەفیقانی کە لووتی ڕەق ئەکا
تالیبی ئاسایشی حیفزی زوبانی کافییە
وەرنە قەولی بێ سەر و پا قەلبی ئینسان ڕەق ئەکا
سابیریتخلص لەوساوە تەبعی ئەهلی دونیای ناسیە
نە بچووکی تێگەیی و نە گەورەیی ئەحمەق ئەکا