حاجی نەقاشا
از کتاب:
شیعرەکانی حیلمی کاکەیی
اثر:
حلمی کاکه‌ای (1882-1966)
2 دقیقه
421 مشاهده
حاجی نەقاشا ...
خودام ڕەنگ بازەن عەجەب نەقاشا
مەیل دەروونم دایم نە جۆشا
سەراسەر جیهان گشت لەشکر پۆشا
مونکیران هەق دەروون ئاڵۆشا
گرۆی عەشق داران تەمام سەر خۆشا
جۆیای دین یار مەست مەد هۆشا
یاڕەب گردمانکەر نەتۆی پەڵۆشا
دەرمان بکیانە پەی گرد نەخۆشا
زومڕەی یارستان ببان دڵ خۆشا
غوڵام خاس بادەی مەی نۆشا
نەواچی مەڵڵا چەنە هەراشا
بێزارم جە دەست فانی قەڵاشا
فرێ قانیعم وە ئەی مەعاشا
گفتارم مەقبووڵ عەجەب قوماشا
جە لای مونکیران سڕ مەکەر فاشا
مەڵڵا کەمتەرین نە خاک و پاشا
تەعتیلم جە دەست کار چەواشا
هەق وەدەست وێش کەرۆش لەواشا
دوشمن دین یار هەر هان چە هاشا
زومڕەی موڕتەدان جەهەنەم جاشا
ئیرادەی یەزدان وەیتەور ڕەزاشا
قیراتش تەمام خەیلێ جەزاشا
تەمام مەغرووران کەفت وە تەلاشا
وەدەست ...متن نامشخص نێکان داغماشا
خەڵات باقی نوورین واڵاشا
زات کردگار مەوزوون باڵاشا
جەمیع یارستان هان جە پەناشا
فریاد ڕەسی یار حازر هاناشا
شادی و شەوق و زەوق وەخت شاباشا
دەنگ ساز و سەمتوور عەجەب سەداشا
فانی وێران مۆ باقی بەقاشا
#
دونیا پەرستان جیفە خوداشا