برا گیان حەیات
از کتاب:
شیعرەکانی حیلمی کاکەیی
اثر:
حلمی کاکه‌ای (1882-1966)
2 دقیقه
403 مشاهده
برا گیان حەیات ...
یاوا پێم نامەت چون ئاب حەیات
ئەحیام کەرد زندە نەڕووی سەر بە سات
وانام سەر تا پا وە کەیف و نەشات
خودای بان سەر مەکەرۆت خەڵات
لایقەن وەنەت ئەی بەش و بەرات
وەختەن جەی گەرداب فانی بین نەجات
جەی ساڵ ماردا وەعدەی زوهوورات
دەلیل قاتیع مەکەرۆ ئیسپات
سەف مێردانەن ڕەمز و ڕمووزات
وەڵەوکن دوورم ڕۆحم ها چە لات
سەر و ماڵ فیدای گەرد خاک و پات
غایەت دڵشاد بیم چە ئەی ئیلتیفات
مەعلووم زیاد مۆ کەشف و کەرامات
جە لای مونکیران ناچی مەڵڵا وات
شەوق و زەوق بتوون زیاد مۆ چە لات
گشت وەیەک شاد مۆ حەیات و مەمات
کەلب هۆشیارم جە قاپی دەرگات
وەهیممەت تۆ واتم ئەی ئەبیات
وەرنە پەرپووتم بێ دەستگا و ئاڵات
دۆعا گۆتانم بەندەی سەنا خوات
دۆعام پەی کەرە مەقبووڵەن ڕەجات
سەر وێنەی گەڵای دار و نەباتات
مەڕێزۆ وەهەم چەنی تورک و تات
دایم هۆشیار بەر نەفس نەکۆ ئیغمات
زاری و واوەیلان پەرێ مونکیرات
کەللەی زاڵمان مەکیانان سۆقات
سەرگەردان مەوان وە تەڵخی ئەوقات
یەکسەر گرفتار زوکوور و بەنات
وا هەق زوهوورەن شادی بۆ خەنات
هەر چوار کتووبات ئینجیل و تەورات
بێ قەدر و قیمەت وەبێ کەرامات
نیشانەی وێشەن ئوستاد سەنعات
عەفوو کەر قسوور دارۆم غەڵەتات