یاران عار بییەن
نامە بۆ حەمە حەیدەر
از کتاب:
شیعرەکانی حیلمی کاکەیی
اثر:
حلمی کاکهای (1882-1966)
2 دقیقه
511 مشاهده
یاران عار بییەن ...
تومەز دینداری وەیتەور عار بییەن
مەگەر ساحێبم لێم بێزار بییەن
جەرگم ڕەخنەدار تەعنەی غار بییەن
غەیر چە زات هەق مەدەد کار بییەن
مەلجاهم ساحێب زولفەقار بییەن
ئاشنای ئەزەلی گشت وە خار بییەن
بێگانەی ئەبەد تاعەت کار بییەن
حەیف پەرێ مەردان گشت خەسار بییەن
مەئلووف جیفە هەم دینار بییەن
وجوودم نابوود زەدەدار بییەن
جە دووری یاران دڵ بیمار بییەن
مەخلووق نادروست بێ قەرار بییەن
ئیمان نەمەندەن دین فیرار بییەن
فیرقەی مونکیران جە ئازار بییەن
دەروێشی ئەی وەخت ژار مار بییەن
دڵ قەید زەنجیر جە حەسار بییەن
بێ شەوق و بێ زەوق تیرە و تار بییەن
عەسری وەیتەورە یاران کێ دییەن
زوڵم و تەعەدا چە حەد بەرشییەن
دووکان مەحجووز بی دڵ بێ شار بییەن
وڵاتان خاپوور کەس دیار نییەن
شکاک جە ڕای هەق گشت ئینکار بییەن
ئەهل هەق بێ قەدر ڕووی ڕۆزگار بییەن
ناکەسان مەغروور یەکسەر هار بییەن
ئاخر سەرئەنجام نیگوونسار بییەن
زەمین دوو ڕەنگان گشت بەیار بییەن
گاو وەرەو نیڵە بێ جفتیار بییەن
نوختەی قەدیمەن چە تومار بییەن
سەردی ساعەتەن کەس هۆشیار نییەن
ئەی بەندەی کەمتەر خەبەردار بییەن
مەڵحەم زام دڵ جەلای یار بییەن
ڕۆح پەی زیارەت حازر کار بییەن
سەر چەشمەی یاری ها عەوار بییەن
ئێستا فرسەتەن هیچ زۆردار نییەن
سەی حەمە جە نەسڵ یادگاراعلام بییەن
پەی لوای زیارەت لێش ئیخبار بییەن
فەقێ جەنابت جە شومار بییەن
پەرێ یارستان هەم دەست بار بییەن
زوانم دایم جە ئیزکار بییەن