کاک حاجی یاوا
نامە بۆ مام موحەممەد دەروێش عەلی
از کتاب:
شیعرەکانی حیلمی کاکەیی
اثر:
حلمی کاکه‌ای (1882-1966)
2 دقیقه
565 مشاهده
کاک حاجی یاوا ...
ئەشعار خۆشت وە دەستم یاوا
وەقت عەسر تەنگ وەر جە خۆر ئاوا
چون خاک کەعبە وەدیدەم ساوا
خانەی زەمیرت یا هەق بۆ ئاوا
تۆم نیان چە شۆن گشت برا و باوا
ئومێدەوارم وە خواجای کاوا
دڵشادمان کەرۆ بێ جەنگ و داوا
چە دووری دیدەت جەرگم چون قاوا
ڕستاخێز مەبۆ چە قاپی فاوا
ئەسیر مەحکووم قەریەی تۆپزاوا
پەی جەمیع یاران دەست وە دوعاوا
چە پەژارەی دڵ نەدارۆم خاوا
وەختەن ساحێبمان بەیۆ چە لاوا
مونکیر تەرد مەکەن چە قاپی کاوا
فریاد ڕەس حازر پا چە ڕکاوا
وەختەن خەڵاس بین چە ئی ئاژاوا
نەجاتمان ببۆ چەی قیل و قاوا
وەعدەی ساڵ مار کریان حەساوا
بیست هەفت ڕۆژ مەندەن وەعدە تەواوا
هەر کەس تەک بدۆ وەیار قەڵاوا
هیچ نییەن وەتەنگ دەرد و بەڵاوا
وێنەی بەیان قوش مەسکەن کەلاوا
خاسترەن چە قەسر زێڕین تەڵاوا
نامووس و عارم نیان وە لاوا
نیەنان وە قەید واتەی خەراوا
حاجی گیان جاگەم قوڕ و زویلاوا
ها لەشکر ئیمان کەردەن بڵاوا
دوعای خێر بکەر پەی ئی ڕووسیاوا
چە هەر چوار ئەتراف ئۆردی جمیاوا
بێ شەوق و بێ زەوق دەروون سووتاوا
گشت باڵ و پەڕم یەکسەر ڕووتاوا
ئیزهار بی وەعەین حەرف کیتاوا
یەخان مەتاونۆ گڕەی هەتاوا
یەکسەر لێڵ بییەن چەشمەی سەراوا
دینشان فەوتنان سەیید و باوا
مامان چەنی یەک مەکەن عەداوا
مەبۆ نۆش کەریم پیاڵەی زووخاوا
ئەنجامش مەبۆ شەهد و شەکراوا
نە سەبر نە تاقەت لالام نەماوا
#
زەعیفەلبەسەر جەرگم بڕاوا