یاران عەیانە
از کتاب:
شیعرەکانی حیلمی کاکەیی
اثر:
حلمی کاکه‌ای (1882-1966)
2 دقیقه
513 مشاهده
یاران عەیانە ...
نیک و بەد چە لای خالیق عەیانە
پەنامان وە زات پادشای یەگانە
لێمان نەگێرۆ عوزر و بەهانە
ئی نەفس زۆردار خەتای کێمانە
سەوقم مەکەری وە ڕای عیسیانە
نەی چاهـ زوڵمەت تیرەی شەبانە
دایم سەرکێشی وە مەغروورانە
وێت کەرد وە تەعنەی خوێش و بێگانە
تەکیەگای قەدیم بی وە مەیخانە
مەعلووم نیشانەی ئاخر زەمانە
مێردان بێ قەدرەن دەور زەمانە
کۆنە ئوجاغان بی وە کارخانە
دین فیرار بییەن نەمەند ئامانە
مەتڵووب و تاڵب مەدۆ پەیمانە
ئیغفاڵش کەرۆ چە خەڵوەتخانە
چە هەزار یەکێ هەن پاک دامانە
ئەر بەهەشت نەبۆ دۆزەخ جامانە
چێش کەرۆن چە دەست ئی بەد زەمانە
بییەن وە فحوول گشت موریدانە
عەیبم بە وێنەی بەحر عومانە
دائیمەل مەدام گفتەم هەزیانە
پەرێ عەیب یۆم عەینم عەمیانە
پەرێ عەیبەلناس هام نە جەولانە
مەعیووبم لاهوور چون ئەسفەهانە
حەیفەن بواچۆن بەدی خەڵکانە
گفتار سەرف مەکەم وەبێ هودانە
خەڵاسیم نییەن چە ئی زیندانە
دونیا پەنج ڕۆژەن موسافر خانە
چەندین نەگوون کەرد پەرێ ئاشیانە
کەردەنم نەوەر خەرقەی ڕەندانە
پەناهم بەردەن وە شای مەردانە
یە گفتەی مەڵڵا غایەت خەجڵانە
چە خەوف مەحشەر جەستەی بوریانە