یاران مەحشەرەن
از کتاب:
شیعرەکانی حیلمی کاکەیی
اثر:
حلمی کاکه‌ای (1882-1966)
2 دقیقه
296 مشاهده
یاران مەحشەرەن ...
مەعلووم نیشانەی یومەلمحشەرەن
برادەر عەدو وە برادەرەن
فرزەند ناڕەزا چەنی پدەرەن
هامسایان خائین وە یەک دیگەرەن
حەڵاڵ ناتفاق چەنی هامسەرەن
ئێدیش ئیرادەی حەیی ئەکبەرەن
عالەم موبتەلای دەرد و کەدەرەن
ئیسپاتەن عالەم وەیەک چاکرەن
چە وەخت تەنگدا وێنەی کافرەن
وەلحاسڵ ئەنجام کارمان خەتەرەن
ئەحواڵمان قەبیح باغمان بێ بەرەن
حێر و شەڕ وە دەست قەزا و قەدەرەن
چە ئافات دەهر خەڵک بێ خەبەرەن
ئافات پڕ بەڵا شۆڕش و شەڕەن
چەی وەختە مەمات خەیلێ خوبتەرەن
فیرقەی پڕ حەیات حاڵش بەدتەرەن
ئی بەندەی ئاخوون قەوم بەقەرەن
چە هەزار یەکێ ئەهل هونەرەن
ماباقی حەیوان گشت بێ بەسەرەن
قووت عاقڵان خوون جگەرەن
ئەطعیمەی خەران شەهد و شەکەرەن
تەوق زەڕینان چە عونق خەرەن
ئەسپانت مەجرووح ژێر کەمەرەن
عاقڵان خاس دڵ موعتەبەرەن
قسەی جاهیلان نێش نیشتەرەن
فەقیران هیلاک گشت دەربەدەرەن
سنف دەوڵەمەندان ئازاد نەسەرەن
تەمام خاس و عام گشت ڕا گوزەرەن
پەنامان وە زات ئاغای قەمەرەن
چە لای ئەهل حەق زەڕ خاکستەرەن
مەرد نێک دایم خدرش ڕەهبەرەن
چەی دونیای فانی جاگەم سەقەرەن
یە واتەی مەڵڵای نەگشت کەمتەرەن