ئەی سەبا ئەی مەحرەمی ئەسراری جەمعی عاشقان
از کتاب:
دیوانی مینە جاف
اثر:
مینه جاف (1911-1965)
2 دقیقه
527 مشاهده
ئەی سەبا ئەی مەحرەمی ئەسراری جەمعی عاشقان
ئەی سەبا ئەی مەڵهەمی زامی بە سۆی خوێنی دڵان
ئەی سەبا ئەی قاسدی عوششاقی سەرگەشتەی فیراق
ئەی سەبا ئەی پەیکی ئەفراح مەقدەمی وەعدەی بەیان
ئەی سەبا دافیعی ئیش و خەمەکەی ئەوگاری دەرد
ئەی سەبا ئەی باوەشێنی گەرمەیی دڵ ئاگران
وا بە شوعلەی ئاگری دووری ئەسووتێ جەرگەکەم
تو خوا هەڵسە لە خەو ئەم سوبحە بەر لە گشت بەیان
خۆت موعەتتەر کە لە گوڵشەن تۆ بە ئەنواعی گوڵاو
پاش ئەوە عەزمی سەفەر کە پشت بە قووەی لامەکان
زوو بڕۆ تو خوا دەخیلت بم مەوێسە لەحزەیێ
تا دەچیتە گردە سەوز و وارگەی ناو تاوێران
تۆ بچۆرە بەرزەبانی پاینی یاڵە دڕێژاعلام
چوویتە ئەوێ بڕوانە دیارە لێتەوە ڕەشماڵەکان
سەیر ئەکەی وا میرەماڵێ وا لە خواری خێڵەوە
ڕوو بکە ئەو ماڵە بێژە ئەسسەلام ئەی قبلەمان
ئەسسەلام ئەی مەهوەشی تازە ڕەسیدەی موشک بۆ
ئەسسەلام ئەی باغچەیی سەر باشقەیی باغچەی گوڵان
ئەسسەلام ئەی تاووسی جوێباری جەننەت ئەسسەلام
ئەسسەلام ئەی نووری هەر دوو دیدە و ئارامی گیان
ئەسسەلام ئەی دووریەکەت مایەی خەم و ئێشی دڵم
ئەسسەلام ئەی هاودەمیت دەرمانی ئێش و دەردمان
جا لە ڕاس ئەو میرەماڵە تۆ بچۆرە خوارەوە
چوویتە بەر قاپی دەخیلت بم بویتە ئەل ئەمان
پرس کە بڕوانە لە خەو هەڵساوە یا خۆ نووستووە
نەک خەوی بشکێنیە چاوی نووری هەر دوو دیدەمان
گەر لە خەو هەڵسی وەکوو ڕۆژ دیارە ناشارێتەوە
چونکە وەک خۆر شەوق ئەدا ڕووی لە ناوی چیخەکان
ئەو دەمەی هەڵسا لە خەو بێ دەنگ بچۆرە ژوورەوە
خاکی بەر پێی ماچ بکە بیماڵە ئەو گردە بە زوان
پێی بڵێ عەرزی بکە ڕوویی تۆ کەعبەی دڵم
وا لە دەوری سەروی باڵات هێند پەشێوە حاڵمان
ئاگری تێ چووگە مینەتخلص چی ئەکا ناکۆژێتەوە
شێت و عەوداڵە دەسوزێت وا لە کێو و هەردەکان