سەرم گەر بەردە بازی ڕێت نەبێ پێشێلی دوژمن بێ
از کتاب:
دیوانی کەمالی
اثر:
کمالی (1886-1974)
1 دقیقه
283 مشاهده
سەرم گەر بەردە بازی ڕێت نەبێ پێشێلی دوژمن بێ
دڵم گەر فەرشی بەر پێی تۆ نەبێ با ئەنجن ئەنجن بێ
لەبەر چاوم ئەگەر یەک لەحزە ون بێ شکڵی باڵاکەت
خودایە دوور لە ڕووی تۆ هەردوو چاوم سووژن ئاژن بێ
ئەکا ئێسکی ڕزیوم دەسبەجێ زیندوو لە پاش مەرگم
ئەگەر ئەو نازەنینە ساتێ بۆ سەر گۆڕەکەی من بێ
ئەگەر ڕوو دەربخەیت لام ڕۆژی ڕووناکە شەوی تاریک
کە کاتێ ڕووت نەبینم لام شەوە با ڕۆژی ڕۆشن بێ
لەگەڵما تۆ کە دەستەملان و یەکدڵ بیت نییە باکم
ڕەقیبی بەدڕەوشت با هەر خەریکی حیلە کردن بێت
ئیرادەی خوایە هەندێ دیلی تاتای پەرچەمە و هەندێ
ئەبێ هەر عاشقی پەنجەی خەناوی و قۆڵ و بازن بێ
کە قووتت دا هەموو یەک لەحزەیە تامی نییە فەرقی
کەمالیتخلص گەر پڵاوی سەدری یاخۆ نانی هەرزن بێ