گرمەی ژانی بەهارێک

ئەی خۆشەویستم
لەسۆزی گەرووی خنکاوت پەستم
من لە تۆ ناگەم بۆ لە دایک بووی
خۆزگەم بەو ساتەی
لە زستان ون بووی
*
خۆشەویستەکەم
بامۆسیقاکەت، شمشاڵی داس بێ
بلوێری جەفا... وێڵی پێ کاس بێ
هاژەی روباری دڵی گەرمم بێ
گلێنەی چاوی کوورەی خەمم بێ
وشەی گۆرانیت نوێ بێ بۆ ئێستا
گەر بەبێ ترس...
قوڕت لە دەنگی گەرووی تر پەستا
گۆرانییەکەی تۆ، بێ هاوتا دەبێ
گەرووی زێڕینیش بێ پەتا دەبێ
*
ئەی نەوهارەی خونچە ژان گرتوو
منیش دەمەوێ، دەمەوێ زیندوو
وشە و ئاوازی گۆرانییەکی دڕ
سازی ئازار نۆش
بێت شۆڕشم پێ بکا بە خوو
ئینجا بە تێکڕا
خەڵکی کوردستان
چەندین بیرسڕ..دەهێنمەوە هۆش
*
ئەرێ ئازیز گیان
لە دوێنێکەوە... گوێم لە دەنگێکە
لە گەرووی ویستی کوردا دەردەچێ
پڕشنگی ئاسۆش، لێخن ڕەنگێکە
بۆ تەواو بیستن...
ترسی تیا دەچێ.