پێشوازێکی برایانە
پیرۆت ئاغا هەردوو دەستی نابووە کەلەکەی، دەتگوت «ساییی کوپەی ترخینە دەکاتەوە، بەپاناییی جادەی بەهەشتدا دەهاتە خوارێ، مڕومۆچ و تووڕە و گرژ گەیشتە مەیدانێک، فریشتەیەکی کەوا سپی، پاتۆل سەوز لەوێ وێستابوو.
بەهەوای زەمانی (پاشا) کە نایب و دەستڕۆیشتوو بوو بانگی کرد:
هۆ.. کاکەی پۆلیس..! کەس وەڵامی نەداوە.
لێی چووە پێشەوە و گوتی:
کاکەی پۆلیس لەگەڵ تۆمە!
- من کاکەی پۆلیس نیم.
- ئەی چیت؟
- فریشتەی ڕێنوێنیم.
- دەی باشە، هەرچییەک هەی، دایرەی مودیر لە کوێیە؟
- ئێرە شتی وای لێ نییە، لە چی دەگەڕێی، کێت دەوێ؟
- لەو کەسە دەگەڕێم کە بەسەر کاروباری ئێرەدا ڕادەگا، پیاو ئەگەر کارێکی ببێ بەکێ بڵێ؟
فریشتەکە تەلیفۆنێکی کرد و پاشان گوتی: لێرە ڕاوەستە، ئێستا دێن دەتبەن. تاوێکی پێ چوو فریشتەیەکی تری وەکو ئەوەکەی هەوەڵ پەیدا بوو لەگەڵ خۆی بردی بۆ لای (خازین)ی بەهەشت.
خازین- فەرموو، دەڵێی چی؟
پیرۆت ئاغا- دەمەوێ وەزعم نەختێ باش کەی.
- بەوردی پێم بڵێ پێداویستت چییە و چت دەوێ.
- پێداویستم بەهەموو شتێکە، نە کەسێک هەیە کەوشم بۆ دانێ، نە نۆکەران هەن دەستەونەزەرم راوێستن، نە فەراش و چایچیم هەیە و نە ئەسپ و تانجی و توولە. هەر هیچم نییە.
- ئەوانەی گوتت لێرە نین و سەرناگرن.
- دەی باشە، دێیەکم بدەنێ، خۆم هەموویان جێبەجێ دەکەم.
- ئێرە دێی لێ نییە.
- دە هێندێکم مسکین بدەنێ، خۆم بە شەق دێیان پێ دروست دەکەم.
- لێرە کەس نادرێتە دەس کەس و کەس ناتوانێ شەق بوەشێنێ.
- دە خەرمانێکم پیشان دەن بیسووتێنم.
- خەرمانمان نییە.
- دەی پێم بڵێ گاگەل لە کوێ هەیە تا بچم بیڕفێنم.
- ئێرە گاگەلی لێ نییە.
- دە ئەسپێک و دوو تانجیم بدەنێ بچم ڕاو بکەم.
- ئێرە ڕاوی لێ ناکرێ.
- دە کەسێکم بۆ پەیدا کەن قوماری لەگەڵ بکەم.
- لێرە قومار ناکرێ..
- دە کەلە و ملەیەکم پیشان دەن بچم خەڵکی لێ ڕووت کەم.
- لێرە جەردەیی و ڕاووڕووت نییە.
- ئەی چۆن ڕابوێرم؟ ئەمە چ بە قوڕە گیراوێکە هەرچییەکی ئەسبابی ئاغایەتییە لێی دەست ناکەوێ؟
ئا ئەم کاول بووە بۆ پێتان دەگوت: «فیها ما تشتهي الأنفاس وتلذ الاعین»؟
هیچ نەبێ ئا لەو خەڵکە چوار کەسم بدەنە دەست، چوار (سەگباب)یان پێ بڵێم و دڵم نەختێ سووکناییی بێت.
- لێرە هەموو کەس وەک یەکن، کەس ناتوانێ (سەگباب) بەکەس بڵێ.
- ها... شیوعییەکانیش هەر ئەم جۆرە قسانەیان دەکرد. ڕەنگە لەگەڵ ئەوان کەین و بەینتان هەبێ.
خازین- ئا کارتەکەت بێنە بزانم!
پیرۆت ئاغا- کارتەکەی دەرهێنا و دایە دەستی.
خازین ڕوانییە کارتەکە و گوتی تۆ بچۆ دەرەوە تا پاشان بانگت دەکەم.
هەڵی گرت و تەلیفۆنێکی کرد بۆ مالکی جەهەنەم:
- لای ئێوە پیاوێکی وا هەیە ناوی (مام پیرۆتی گاوان) خەڵکی پیرۆت ئاوا بێ؟
- (دوای تاوێک)- بەڵێ هەیە.
- بینێرنە ئێرە.
دوو یاساولی جەهەنەم مام پیرۆتیان هێنا. مام پیرۆت کابرایەکی ڕەقی، وشکی، دووکەڵاوی و لاهەلپڕوزاو.
خازین- مام پیرۆت! بۆچی کارتەکەی خۆت داوە بەو کابرایە؟
مام پیرۆت- من نەمداوەتێ. ئەمانە لە زەمانی (تموین)ەکەوە فێر بوون هەر کوتە کاغەزێکمان پێ ببینن لێمان دەڕفێنن. کە کارتەکەیان دامێ، ڕفاندی. ئەو تێروتەسەل و باوی قاچی خۆش بوو، ڕای کرد. من ئەوەندەی تەکانم دا هێزی ئەژنۆم نەبوو، نەیگەیشتمێ.
خازین- (ڕووی کردە یاساولەکان: ئەم پیاوە لێرە دەبێ. بچن لە جیاتیی ئەم، ئەو کابرایەی دەرەوە بەرن. یاساولەکان چوون، هەریەکەی دەستی دا هەنگلێکی پیرۆت ئاغا کە بیبەن.
پیرۆت ئاغا چەپا و چەپ لێیان وەستاوە و نەڕاندی:
سەگباب! بۆ ئەوەندە ناڕەسەن و بێ ئەدەبن. یاساولەکان دوو سێ گورزی ئاگرینیان سرەواندە ناوشانی و پێش خۆیان دا. کە گەیشتنە دەرگەی جەهەنەم، شەیتان هاتبووە پێشوازی و بانگی کرد:
- وەرە! برای ئازیزم وەرە! هەزار ئافەرین لێرەش ئاغایەتیی خۆت نواند!