خودا بە ئیعجاز ئەنبیایانت
از کتاب:
دیوانی ناتیق
اثر:
ناطق (1886-1967)
1 دقیقه
648 مشاهده
خودا بە ئیعجاز ئەنبیایانت
بە ڕووتبەی بەرزی ئەولیایانت
بە سیدقی پاکی خولەفای ڕەسوول
بەشقی ئەسحاب و فاتیمەی بەتوول
بە حەقانییەتی شەوەکەی میعراج
نووری خۆت بەخشی بە زوڵماتی داج
بە شەوق و جیلوەی ئایاتی قورئان
بە ئەحادیسی قودسیی خۆش بەیان
بە شەوی ڕەحمەت «لیلة القدر»
بە ڕۆژی شەهید شەڕەکەی بەدر
عەفوو بفەرموو لە گوناهانم
چونکە لە زومرەی بەد گومڕاهانم
توێشووم خاڵییە لە دانەی ئیمان
بەزەییەکت بێت بە نەبوونیمان
هەتاکو گەنج بووم لە ڕووی نەزانی
خۆم دایە دەستی هەوای شەیتانی
شەیتان گەنجینەی ئابڕووی بردم
مەزرەعەی دینی دروێنە کردم
لە ڕێی حەق لای دام بردمیە سەر ڕێی شەڕ
کۆتری ئیمانمی کرد بێ باڵ و پەڕ
هەر بەرەو لای خۆی پەلکێشی کردم
یەخەی بەرنەدام تا پیری کردم
ئێستە پیربووم نۆبەمە نۆبە
ڕووم هەر لە تۆیە خودایا تۆبە
ناتیقتخلص دڵخۆش کە بە نووری هودا
«لەگشت گوناهێ خۆش ئەبێ خودا»