پاشای بابانی بڵێ
از کتاب:
دیوانی ئەسیری
اثر:
اسیری (1895-1962)
2 دقیقه
846 مشاهده
چاوەکەم بۆ لاوی گەل تەئریخی بابانی بڵێ
ساز و بەربوت لێ مەدە، ئای ئای و گۆرانی بڵێ
باسی چیرۆکی وڵاتی ئامریکا بۆ ئەکەی
باسی پێشوونان و گەورەی کوردی سۆرانی بڵێ
باسی زۆر و دەبدەبە و شاهانی کلدانی مەکە
دەبدەبە و زۆریی بڵندی شاهی ئێرانی بڵێ
چەند حوکمدارت لە بەتلیس و لە بۆتانا بووە
گەر بەوە عیلمت نییە پاشایی بابانی بڵێ
باسی گۆلی جەنەوە و باغاتی لوبنانیش نەکەی
ئاوی کوردستان و باغ و قەسری بۆکانی بڵێ
هات و بەدبینێ وتی تەئریخی پێشووی تۆ نییە
جاهیلی، عیلمت نییە، سا حەچە حەیوانی بڵێ
مەکڕە سندووقێ بڕێسێ میسری و تورکی و حیجاز
لێدە سندووقێ بەیات و لاوک و حەیرانی بڵێ
باسی قەند و شەککەری بەلچیک و پاریس بۆ ئەکەی
باسی دۆشاوی سپی و هەنجیری شێخانی بڵێ
کاری جەرمەن هەرچەنێ چابێ بەتۆ چی چاوەکەم
شاڵی زاخۆ و پەستەکی بانە و مەریوانی بڵێ
باسی عەزمی لەشکری ژاپۆن و تورکی بۆچ ئەکەی
باسی دێوانە و خەلیفەی شێخی بارزانی بڵێ
پێت دەڵێن شێخی ئەسیریتخلص دەم لە میللییەت مەدە
پیاوێ خزمی خۆی نەوێ، بێ کەڵکە ئیمانی بڵێ