گەزۆ هاوین ئەبارێ
از کتاب:
دیوانی ئەسیری
اثر:
اسیری (1895-1962)
2 دقیقه
756 مشاهده
ئەلەم ژوورە (گەزۆ) هاوین ئەبارێ
ئەلەم خوارە بەشەو (قەتران) ئەبارێ
لە بەرزایی و چیایی خاکی کوردان
سەراسەر کانییە و ئاوە بەجارێ
لە نزمایی و نشێوی خاکی تاتان
دەسووتێی و دەخنکێی بچیە لاڕێ
لە هەردە و دەشت و شاخ و شیوی ئێمە
هەموو فەسڵێ دەبینی نەوبەهارێ
لە دەشتی وشک و گەرمی بێ درەختیان
نییە باغێ، نەبێستانێ، نەدارێ
سەراسەر موڵکی کوردستانە ئاوا
لە بەینی چەند دێیێکی کۆنە شارێ
هەبێ لەو خوارە شار و باغ و بێستان
بەبەرماوە و دەساوی کورد ئەپاڕێ
نییە بستێ زەوی لەو ژوورە بێ کەڵک
زەوی لەم خوارە زیخە و، خۆڵ ئەبارێ
شنەی بایی بەیانی سەرکەلی ژوور
کزەی مردوو ئەکا زیندوو بەجارێ
گڕەی سامی کوشندەی گەرمی لای خوار
لە جێدا دەس بەجێ گیانی ئەتارێ
کەچی لات و هەژارن، خەڵکی لای ژوور
هەموویان دەوڵەمەندن خەڵکی خوارێ
هەموو کۆمەڵ ئەکەن، هۆگر ئەبن (تات)
هەچی کوردە لەیەک لالووت و لاڕێ
ئەوان خۆیان دیاری کرد لە عالەم
گەلی کوردیش لە دووی عالەم ئەکاڕێ
سەرم ماسیوە لەم کارە برا گەل
ئەدیبێکم دەوێ، هۆشەنگێ، یارێ
جوابێکم بدا چیبێ ئەسەل وا
ئەمان وان و، ئەوان وا تێنواڕێ
ئەسیریتخلص تێک چووە لەم کارە هۆشی
نەما بیری بدا داکو قەرارێ