غەما عشقێ پەرهتم ئەز، حەبیبا غەمڕەڤین کانێ؟
از کتاب:
دیوانی مەلای جزیری
اثر:
ملای جزیری (1570-1640)
3 دقیقه
837 مشاهده
غەما عشقێ پەرهتم ئەز، حەبیبا غەمڕەڤین کانێ؟
سەراسەر تێک بهێتم ئەز، ژ دەردێ فەرق و هجرانێ
فراقا دلبەرا ڕندە، بهێتم هەر وەکی فندە
موسلمانەک د ڕێ من دە، خەبەر بت بالی سولتانێ
خەبەر بت بال شەکەرخایێ، شەپال و خووب و زیبایێ
کو میرە بەلکی بیر نایێ، ئەسیرەک وێ د زندانێ
ئەسیرم لەرزە و تاڤێ، م تاقەت ڤێ نە پەروا ڤێ
د حەبسا وێ قە من ناڤێ، بکم فەریاد و ئەفغانێ
م ناڤێ ئەز ب فەریاد کم، ل زولما دلبەرێ داد کم
سەحی دێ شوبهی فەرهاد کم، بدم رووحێ ژ کۆڤانێ
ژ کۆڤانا تە شیرینێ، دنالم شوبهی گۆیینێ
دڕێژم هێسترێن خوینێ، وەکی تاڤێ د بارانێ
وەکی بەرقا بوهاری ئەز، ژ دەست چەشمێن خوماری ئەز
دکم فەریاد و زاری ئەز، مەگەر جارەک کی ئحسانێ
تو پوڕ ئحسان خوەی ڕەحمی، ل دەروێشان ئا بێ خەشمی
چ بیتن گەر ب نێڤ چەشمی، نەزەر کی تو ل ئاستانێ
ل من پورسەک ب دلداری، دبت هەمتایێ دیداری
ڤەوەستایم د فەرواری، ل عەبدێ خوە کە فەرمانێ
د فەرمانێ ڤەوەستایم، د بەندا خدمەتێ دایم
وەکی گۆی بێ سەر و پایم، هەمان لێ دی تو چەوگانێ
ل بەر چەوگان و کاشوویان، ژ دەربا تورک و هندوویان
دبازم هەر وەکی گۆیان، دەما ئەو تێنە مەیدانێ
دەما ئەو تێن ب بازی تێن، د گەل قەوسێن شیرازی تێن
چ مووکارن د تازی تێن، ب دەعوا تێنە لێکدانێ
ب دەعوا تێن مە یەغما کن، د عامێ شوور و غەوغا کن
سەواش و فتنەیان ڕاکن، ب شیر ئەو تێنە تالانێ
دو تالانچی د مەشهوور تێ، ژ مەعدەن عەینی کافوور تێ
د تێکل زولمەت و نوور تێ، مە کوفری دی د ئیمانێ
مە کوفری دی د ئسلام بێ، ژ شەرقێ زولمەت و شام بێ
ژ زولفان عەنبەرێ خام بێ، کنارێ خال و نیشانێ
دو زولفێ عەنبەرئەفشانن، دو لەعلێ شەککەرستانن
دو چەشمێ سحرێ فەتتانن، دلێ من وان خەدەنگ دانێ
دلێ من وان خەدەنگ لێدا، د بورجا رووز و شەب تێدا
ل سەلوا مار لڤین پێدا، ب مەستی هاتە سەیرانێ
ل سەلوێ مار ب لەف هاتن، د بورجا تیپ ب سەف هاتن
ژ باتن تیر ب خەف هاتن، ژ بەر بەندا گریبانێ
ژ بەر بەندا نقابا وێ، ل بەر فەتلا عسابا وێ
جەمالا ماهتابا وێ، مە بەدرەک دی د سەیوانێ
هەییڤ بوو ئەو د زولماتێ، دخوم سووندێ ب ئایاتێ
کو نوورێ دا سەماواتێ، ئەسەد هات ڕاستی میزانێ
قەمەر هات ڕاستی پەروینان، ژ بۆ خەملێ شەمال ئینان
مە نێرگز دین د نەسرینان، د نێڤ باغێ گولستانێ
د باغێ من مەدام دل تێ، جنەسری و سووسن و گول تێ
بەنەفش و تەرح و سونبول تێ، چەڤین سەر شوبهی رەیحانێ
ل دێمی سونبولان سەر دان، چەڤین سەر سووسن و وەردان
ل ماهێ عەقرەبان گەڕ دان، د سەردا ئابێ حەیوانێ
ژ عشقێ لەو مەلاتخلص خەستە، ژ حەرفا بادەیێ مەستە
ژ هووش و عاقلی ڕەستە، ل دەر گۆشێن د مەیخانێ