ڕوتبەی عەزەمەت

ئەخلاقی
لە کتێبی:
دیوانی شێخ نووری
بەرهەمی:
شێخ نووری شێخ ساڵح (1896-1958)
 1 خولەک  664 بینین
ڕوتبەی عەزەمەت، لائیقی زاتێکە بزانێ
وەک خۆشی دەزانێ و بزانێ کە دەزانێ
نەک لائیقی شەخسێکە، نەزانێ و نەزانێ
نازانێ ئەوە خۆشە بەلای خەڵقی جیهانێ
بێ سوود و زیانێ
نابی بە مونەوەر بە گوڵی یەخەیی چاکەت
عومانی سەراب، بوونی بە دەریاچە مەحاڵە
زەرد ڕووکەشی زیویشی ببێ، نایەتە قیمەت
ئیعلانی عەوارز، وەکوو ئیسنادی خەیاڵە
تابع بە زەواڵە
وەک شەوقی تەپاڵە
تۆ چیهرە بە پۆدرە مەبەرە دەورەیی عالی
ناگاتە گوڵێ، باری کزەی وەرسەیی خاشاک
وەک تەیری موقەبا، کە لە کاغەز پەڕ و باڵی
بۆ بکرێ ئەفڕێ، وەها دێتەوە سەر خاک
غولیا زەدە غەمناک
«لاوانتە» دووسەد شووشە بە خۆتا بڕژێنی
وەک غونچە بەسەر دڕکەزییەکا، بچەقێنی
بێ نەشئەیە چۆن مردوو بە زیندوو ئەدوێنی
مەر بلبلی ئەو گوڵشەنە هەر خۆت بی بخوێنی
بۆ کەس نییە بێنی
«بی» تاڵە ئەگەر شەککەر و شەهدی بەسەرا کەی
نەشئەی نییە، هەر سواڵەتە سەد پڕ بێ لە بادە
چیلکە چییە؟ باکورتەکی سەوزی بە بەرا کەی
گەر عاقڵی لەم ژینە بێ قیمەتە لادە
ئەم کیبرە بەبادە