گەردەلوول

براینە!
تەماشا کەن
لەو پێدەشتانەی خوارەوە
هەتا چاوی چەکمان بڕ کات
گەردەلوولی سووری ئێمە
چۆن هەڵئەکات؟
تەماشا کەن
لە گێژەنی تووڕەبوونیا
لەگەڵ خۆیدا
دوژمن تا کوێ ڕاپێچ ئەکات؟
گەردەلوولە، گەردەلوولە
گەردەلوولی گەرمیانە.
تەماشا کەن:
لەو پێدەشتانەی خوارەوە
بە دێهات و بە شارەوە
لە «سەرقەڵاشوێن»وە تا «دوبزشوێن»
لە «دوزشوێن»ەوە هەتا «هەکزشوێن»
ئەم شمشێرە سوورەی شۆڕش
چۆن ئامادە
لەڕووی مەرگا هەڵکێشراوە.
گەردەلوولە، گەردەلوولە
گەردەلوولی گەرمیانە
براینە!
تەماشا کەن
لەو پێدەشتانەی خوارەوە
کە وەک لەپی دەستی ڕەنجدەر
هەڵقرچاون
کە وەک قاچوقولی ڕووتی هەژار
قڵیشاون
تەماشا کەن:
چ ئاگرێ بەربۆتە شەوی ئەو ناوە
چ دۆزەخێ بۆ داگیرکەر داخراوە
گەردەلوولە، گەردەلوولە
گەردەلوولی گەرمیانە.