شتنەوە و ناوچەوانم

ئەیشواتەوە، چۆڕاوگەی سەربانی لێژی ساڵەکانم
-دیواری ژووری قوڕینیی
بێگوێسوانەی کرێچێتیم ئەشواتەوە
ئەیشواتەوە، ئاوی مردووشۆری کوڵاو:
تاقی پێشوازیی زیندۆکان، ئەشواتەوە.
دروشمە بەرئاوەژۆکان، ئەشواتەوە.
«ئەم سەردەمە، گەرماوێکە:
پاکەکان، پیس ئەکاتەوە و پیسەکان، پاک ئەکاتەوە»
ئەمگڵۆفن، لەسەر سەکۆی کۆنکرێتی سوپاگەیەکی دەرسیمشوێنا
ئەمگڵۆفن، ئەمگڵۆفن
هەڵم ئەخەن بە تەنافی ڕاکێشراوی
سەر ئاسمانێکی کونبوودا، لە سابڵاخشوێنا
هەڵم ئەخەن
«فڕۆکەکان
فڕۆکە - دەنگبەزێنەکان -
فڕۆکە چاو قوتدەرەکان
ئاسمانی ڕاستییان کون کرد
- تا خوای لێ کەوتە خوارەوە -.»لە دەرسیما، ئەمگڵۆفن
لە سابڵاخا، هەڵم ئەخەن.
«لە تەشتی ئەم سەدەیەدا
سپیڕەنگ، ڕەنگ ئەداتەوە!»
ناوچەوانم کێڵگەیەکە
گاسنەکانی سەردەمی «ناپاڵم»ە، کێڵاوێتی
خوێن تۆوێکە، تیا ئەچێنرێ.
دەغڵ سوورە، داسی برسیم
گەروویەکە دروێنەی برسێتیی ئەکات.
خەرمان سوورە
شەن چنگێکە، بێ نینۆکە، داخ کراوە و
زامەکانم بە با ئەکات.
جەنجەڕی شەو، ڕۆژەکانی ناوچەوانم
گێرە ئەکات.
ناوچەوانم – لاکێشێکە -
لەناو – بازنەی - زەمینی گێژ و وڕا
دێت و ئەچێ!
ناوچەوانم، بەڕەیەکە:
لەبەر پێی پۆستاڵەکانا ڕاخراوە.
ناوچەوانم، پەنجەرەکەی دانەخراوە
دزەکان پیا دێنە ژوورێ!
خەتەکانی ناوچەوانم، ڕێی ئاسنیی قیتارێکە
ئێستگەی حەسانەوەی نییە!
ناوچەوانم، ناوچەوانم نوێنێکە
شکاویشە و داگیرساوە!