مایکۆڤسکی

گوێ گرن لێم! دەنگم ئەپرژێنمە چاڵی چاوتانەوە
مۆمی چاوتان، لە دەنگما دائەگیرسێنم.
تاریکیتان، ئەخۆمەوە.
تەنیایەکم، شۆستەی شەقامی نیوەشەو
لە مۆسکۆشوێندا، دەرم ئەکات.
چەقبەستنتان، ڕاوم ئەنێت.
بێجێیتان، داڵدەم ئەدات.
تەنیایەکم، هەمووتانم.
گوێ گرن لێم! گوێ گرتنتان وەک ڕەشەبا هەڵم ئەکات.
گوێ گرتنتان، ڕوانینێکە و وشەکانم بەدیی ئەکات.
وشەکانم، سەرمایانە
سەرمایانە و هەڵنالەرزێن.
- گوێ گرن لێم، هەر وەک گوێ لە زەریا ئەگرن-
تەنیایەکم، شەوەکانتان پەنجەرەن بۆ شیعرەکانم
ئەیانکەمەوە و هەناسەی
ئەستێرەکانتان هەڵەمژم.
تەنیایەکم، «پاریسشوێن» لە دڵما ون بووە
تەنیایەکم، هەمووتانم.
تەماشام کەن، تەواو نابم:
ئەکوڵێم، هەڵمم
کە ساردبوومەوە، بارانم
لەبەینی هەڵم و بارینا
لەدایک بوون، شیعرەکانم!
من ئەمەوێ - مەحاڵ - بگرم
دەرگا لەسەر – گومان - داخەم.
ئەم جارەیان، گەشتێک ئەکەم
تەنیاتان کات
لەگەڵ شەوێکا، کۆچ ئەکەم
خەوتان لێ خات.