تەژنەی گیان وە لەب سەودای سەبووری
لە کتێبی:
دیوانی مەولەوی
بەرهەمی:
مەولەوی (1806-1882)
2 خولەک
1168 بینین
تەژنەی گیان وە لەب سەودای سەبووری
کەفتەبێم نە گێج دەریاکەی دووری
دیم نەشئەی فێنک سێراوی سەردا
شنۆی زیندەگیم ئاما وە بەردا
چێش خزرکەس نامەی تۆش ئاوەردەوە
دەک ڕستگار بۆ ئیحیام کەردەوە
یاوا پێم پەرێم زایەڵەی زاریت
زگاریی زامەت بێ دەوای کاریت
مزانوو، هامفەرد، پڕ شەرت و شۆنی
یارم، دڵدارم، غەمخوارم تۆنی
بەڵام تۆیچ ئاخر ڕەنجت بەردەبێ
چەند جار ژاری مار دووریت وەردەبێ
پەی چێش وستانێت ئەی مەهلەکەی سەخت
فتوای لوات دا، لوا وە بێ وەخت
زوانت، وەختێ ئیزنش تەڵەب کەرد
لاڵ کەی نمەبۆ چەنی «ئا»ش ئاوەرد
چەم بێ پەی دینش بیناییش کەم بی
گۆش بێ شنەفتش سەداش ماتەم بی
تەن بێ بارکێشیش خەستەی هیجران بی
دڵ بێ مەنزڵگەی مەیلش وێران بی
چ دادێ مدۆ خاکم وە سەر بۆ
ئیسە تەمای من یا زایەڵەی تۆ
مەعلووم بی وەنەم حەسرەتت کێشان
پەی سەیر و سوحبەت سەفای دڵڕێشان
هامڕەفێقم دەرد، هامسوحبەتم کۆس
وێم جە وێم خاڵی، مەوج مدەو جە دۆس
تا ئەو بەو جەماڵ دڵ دەسە پاڵەن
من سەیرم مەحاڵ، سەفام بەتاڵەن
جەو بۆنۆ فەردم ئیستیفا بێزەن
دامەنەش لایق ئەی پەراوێزەن:
شێوە ئەر ئێدەن من کەردەنم سەیر
فام، خودا حافز! دین، بنیش وە خەیر!
تۆ سەروەش وەی سەیر سەفا و بەختەوە
من وێڵ وێڵ وەی زام سزای سەختەوە
تۆ هەر سات شادیت بێئەندازە بۆ
من هەر لاد دەردێ پەرێم تازە بۆ
تۆ وێنەی بوڵبوڵ مەستی هەوای گوڵ
من چون بایەقوش چۆڵی نەوای دڵ
پەرێ تۆ ڕاحەت، پەرێ من زامەت
هەردوو سڵامەت، تا ڕۆی قیامەت