tejney gyan we leb sewday sebûrî
From the Book:
Dîwanî Mewlewî
By:
Mawlawi Tawagozi (1806-1882)
2 minutes
847 views
tejney gyan we leb sewday sebûrî
keftebêm ne gêc deryakey dûrî
dîm neş’ey fênk sêrawî serda
şinoy zîndegîm ama we berda
çêş xizirPerson namey toş awerdewe
dek řistigar bo îḧyam kerdewe
yawa pêm perêm zayełey zarît
zigarîy zamet bê deway karît
mizanû, hamferd, piř şerit û şonî
yarim, diłdarim, ẍemxiwarim tonî
bełam toyç axir řenicit berdebê
çend car jarî mar dûrît werdebê
pey çêş wistanêt ey mehlekey sext
fitway lwat da, lwa we bê wext
zwanit, wextê îzinş tełeb kerd
lał key nimebo çenî «a»ş awerd
çem bê pey dînş bînayîş kem bî
goş bê şineftiş sedaş matem bî
ten bê barkêşîş xestey hîcran bî
dił bê menziłgey meyliş wêran bî
çi dadê mido xakim we ser bo
îse temay min ya zayełey to
me’lûm bî wenem ḧesretit kêşan
pey seyr û suḧbet sefay diłřêşan
hamřefêqim derd, hamsuḧbetim kos
wêm ce wêm xałî, mewc midew ce dos
ta ew bew cemał dił dese pałen
min seyrim meḧał, sefam betałen
cew bono ferdim îstîfa bêzen
dameneş layq ey perawêzen:
şêwe er êden min kerdenim seyr
fam, xuda ḧafiz! dîn, binîş we xeyr!
to serweş wey seyr sefa û bextewe
min wêł wêł wey zam sizay sextewe
to her sat şadît bê’endaze bo
min her lad derdê perêm taze bo
to wêney bułbuł mestî heway guł
min çun bayequş çołî neway dił
perê to řaḧet, perê min zamet
herdû siłamet, ta řoy qyamet