چراغم نەسەر
لە کتێبی:
دیوانی وەلی دێوانە
بەرهەمی:
وەلی دێوانە (1826-1881)
2 خولەک
953 بینین
چراغم نە سەر، چراغم نە سەر
هەر من نیم سەودای عەشق تۆ نە سەر
قێبلەم گشت عاڵەم جە من زیادتەر
نەسەودای عەشقت وێڵەن دەربەدەر
وە هەرجا مەشۆن هەر باس تۆ بێ
هەر کەس دیم نە فکر هەراس تۆ بێ
نامت نە دەفتەر دڵبەران تاجەن
شاهان حەسرەتمەند، گەدا موحتاجەن
چەن موسڵمانت وەناحەق کوشتەن
نیگات نە جەرگ چەند بێدڵ نیشتەن
چەند موڕشید شەیدا، چەند سۆفیان مات
ماتن نە سەودای عەشقت گشت خێڵات
«فەقێ»ت ڕسوا کەرد، «مەڵا» سەرگەردان
«دەروێش» دڵڕێش وێڵەن نە هەردان
پەروانە دەستوور بوڵبوڵ شەیداتەن
دڵەی دەردەدار هەر نەسەوداتەن
قێبلەم چون تەسویر تەرسای جام جەمین
شێخ «سەنعانکەس»ت وەرگەڕا جە دین
خوداوەند ئەو ڕۆ حوسنێ وە تۆ دا
سۆفیان ساف گشتدا وە کۆدا
جە چەمەن هەی داد، نە سەحرا هەی ڕۆ
داد و بێدادەن گرد نە دەس تۆ
نە خێڵان غەوغا، نە شاران شۆرەن
هەر کەس دیم هەر دیم تۆشەش زەروورەن
ئەر فەرهاد ئەر قەیس بزانان خەبەر
دووبارە جە خاک «ئەڵحەد» مەدان سەر
مەێون وەی غەوغای قیامەتەوە
وە سەیر باغچەی ئیقامەتەوە
تا کە زندەنان شای شەم جەمینم
دێوانە و غەمبار دڵ ماتەمینم