هاوار بۆ ژنان
لە کتێبی:
باخچەی کوردستان
بەرهەمی:
قانع (1898-1965)
2 خولەک
754 بینین
برای هاوزمان، تۆ نازانی کێم؟
سا هەر کەسێ هەم گوێ ڕاگرە لێم
ئەرچی نامناسی تۆ برای چاک بە
دەرهەق بە ئافرەت تەواو دڵپاک بە
ئافرەت شەریکی خێزانی تۆیە
ئافرەت خەمخۆری میوانی تۆیە
هاوڕێی ژێر لێفە و هاوڕێی ناو ماڵن
شەریکی ماڵ و شەریک مناڵن
ئەر تۆ خراب بی هەر کاتێ لێی دەی
یاخۆ جنێوی ناحەقی پێدەی
ئەو هەر مەجبوورە و هەر لە پەناتە
بەغەیر ئەز گریان چی دەسەڵاتە؟
زۆر زۆر لێت زیز بێ بڕوا لە وڵات
لەپاش دوو سێ ڕۆژ دێتەوە بۆ لات
بۆ سێ ژن دێنی بۆ سەر جێگەی ئەو؟
ئەو بۆ شوو ناکە بە وەعدەی یەک شەو؟
مەعلووم پیاوێ تر بچێتە پاڵی
دەم ببا بۆ لای ڕوومەت و خاڵی
ئەو ئێش و داخە لە جەرگی تۆیە
بۆ جەرگی ئەویش هەروا بە سۆیە
کە ئەو دەنگ ناکا وازی لێ بێنە
لەسەر خۆڕایی دڵی مەشکێنە
ئەو کوڕە چاکە و ئەو کچە جوانە
تۆ لێت مەعلووم بێ هین هەردووتانە
نەخۆش بکەوی ئەو بۆی نەخۆشە
خوا نەخواست بڕێ ئەو بۆی پەرۆشە
هەر وەک خزمەتکار خزمەتکارتە
لە عەبد زیاتر بەردە بارتە
هەرچی تۆ بڵێیت ئەو هەر وا ئەکا
بەشوێن ئەمرتا خێرا ڕا ئەکا
بێبەشی مەکە لە ڕابواردن
با وەک یەک بژین تا ڕۆژی مردن