نەتیجەی خۆهەڵکێشان پەشیمانییە
لە کتێبی:
باخچەی کوردستان
بەرهەمی:
قانع (1898-1965)
2 خولەک
440 بینین
ساڵێ کابرایەک چەخماخسازێ چاک
ژیر و لەسەر خۆ دەس و دەسا و پاک
لوولە کۆنێکت ببردایە بۆی
ئەیکرد بە تفەنگ وەک کارخانەی خۆی
بە چاوی خۆم دیم لە شارەزوورشوێن بوو
بەڵام بە ژیری خۆی زۆر مەغروور بوو
چوو بۆ سەر دووکان، دووکانی دۆمێ
دۆمێ سەد ساڵە پیر و پشت کۆمێ
کاتێ چاوی کەوت بە مشتە و گازن
دەزگا و چەرمێڵە و پێکەنە و پەڕۆچن
زۆر زۆر پێکەنی بەم ئەسبابانە
ئەیوت ئەمیشە ئەسبابی نانە؟
دانیشت لە جێگەی پیری کۆماوە
تاکێ کڵاشی هێنا بەملاوە
شفرەکەی هەڵگرت بۆ بڕیامانی
چوون ئیشی نەبوو هیچ لێی نەزانی
کاتێ شفرەکەی نایە سەر پەڕۆ
پەنجەی خۆی قرتان خۆی کرد ڕەنجەڕۆ
هەرچی هەوڵیدا دەسی سەقەت بوو
سەنعەتی خۆیشی لەدەسی دەرچوو
لەم ئاخرییەدا تەواو کەوتە سواڵ
ئەسووڕایەوە لەم ماڵ بۆ ئەو ماڵ
کەلک
کاکە گشت بەشێ بەشی خوایە
بزانە سەنعەت یەک لە یەک جیایە
نابێ مەغروور بی بەوە کە ئەیکەی
لە دەسکاری خەڵک هەر تەعنە بدەی
کەی بزانی کە خوای هەمووان
هەریەک بەجۆرێ دنیای دامەزران
یەکێ بە شێتی، یەکێ بە ژیری
یەکێ بەجوانی، یەکێ بە پیری
خوا ئەم دنیایەی وەها داناوە
بەم جۆرە ئەڕوا هەتاکوو ماوە