ئەبولعەلای مەعەڕی
لە کتێبی:
باخچەی کوردستان
بەرهەمی:
قانع (1898-1965)
1 خولەک
504 بینین
بیستم بولعەلا تا دنیای ڕابوارد
لە کەم تا بەزۆر هیچ گۆشتی نەخوارد
چون ئەیوت ئەویش وەک من گیاندارە
حەز لە ژین ئەکا لە مەرگ بێزارە
وەختێ کە کەوتە حاڵەتی مردن
ڕۆژی سەرە مەرگ گیان تەسلیم کردن
حەکیم بۆی نوان گۆشتی سوورۆ بوو
بیدەنێ بیخوا هەروا زووبەزوو
بە ئەمری حەکیم خزمەتکار ڕای کرد
کەڵەشێرێکی هێنا دەس و برد
سووری کردەوە لەپاڵیا داینا
قسەی حەکیمی چاک بەجێ هێنا
وەختێ بولعەلا کە تەماشای کرد
لە داخ کەڵەشێر بەتەواوی مرد
ڕوانی بە گۆشتا و زار زار بە گریان
ئاهی ئەکێشا لە جەرگی بوریان
وتی ئەی فەقیر بۆچی هار نەبووی؟
یا هەر وەکوو شێر یا ڕەشمار نەبووی؟
تا کەس نەوێری دەست بۆ بێنێ
یا لەناو ڕۆنا هەڵت قرچێنێ
بەڵام بەش هەژار تەنها مردنە
دەوڵەمەند لە خۆی ڕازی کردنە
مردن لە ئەزەل بۆ پیاوی فەقیر
بڕا بە باڵای وەک کەوای حەریر
دەوڵەمەن ئەمرێ ئەمما یەکجارە
مردنی هەژار سوبح و ئێوارە