ئەم بازاڕە
لە کتێبی:
گوڵاڵەی مەریوان
بەرهەمی:
قانع (1898-1965)
1 خولەک
599 بینین
کوردە بنواڕە کە دنیا چۆن خەریکی سەروەتە
ڕەببی تۆ ڕاستۆ نەبی وا ئیش و کارت غەفڵەتە
کوردە شەرمی زەند و بابا ئاردەڵانت ناتگرێ؟
هۆزی تاریک و درۆزن سوودی دەرد و زیللەتە
قونبولەی زەڕی تەیارە و ڕادیۆت دیوە بە چاو
تۆ تەریق نابیتەوە ڕەفتارەکەت وەک وەحشەتە
گوێ لە یاری پڕ گەزاف و پڕ درۆ مەگرە بە هیچ
چوون شەریکی کردنی پیاوی درۆزن نەگبەتە
تۆ لەگەڵ هاوتیرەکەت دەس ناگری تا سەرکەوی
گەر بە تەنها هەوڵی خۆتە ئارەزوت زۆر زەحمەتە
وابزانم وائەزانی جوانی و لووسی بەسە
میللەتێ تۆ سەردەسەی بی، قوڕ بەسەر ئەو میللەتە
هەر کەسی لافی درۆی لێدا وتی دڵسۆزتم
تەجروبەی کە جا ئەزانی، چۆن خەریکی تەفرەتە
پرچ و بەرماڵ و سیواک و ڕیش و کەشکۆڵ و عەبا
بۆ سواڵن کەی ئەمە ئەسبابی ژین و حورمەتە
لاوی کورد خوێندن بخوێنە یەکیەتی و ڕاستیت ببێ
جا ئەزانی کێیە قابل تەخت و تاج و دەوڵەتە
قانعاناسناوی ئەدەبی هاوار ئەکەی ئەمما چ کەس گوێ ناگرێ
زەربی تەمسیلە قسەی بەر ئاگرت بێ قیمەتە