وێنەی سەر لێ شێواوم
لە کتێبی:
چوارباخی پێنجوێن
بەرهەمی:
قانع (1898-1965)
1 خولەک
889 بینین
وێنەی سەر لێ شێواوم
پێشکەش بە دەستەی لاوم
ئەم وێنە ئەرچی پیرە
بە ڕاوێژ و بە بیره
ڕۆژێ ئەبێ، کوردستان
ئەدەب بکڕێ بە گران
یەکێ ئەپرسێ لە دوو
نازانن ڕەنگی چۆن بوو
«قانعناسناوی ئەدەبی» شاعری کۆنە
خۆزگە ئەمزانی چۆنە؟!
وێنەم بۆ ئەو زەمانە
لک لابەری دڵانە
وێنەم بەپێی وتارە
بە شعرەکانا دیارە
کە بێ پارە و هەژارم
هەژاری کوردەوارم
بۆیە بێ شوێن و بێ جێم
پەروەردەی کونجی لادێم
هەر چیم زانی کەم و زۆر
هەمووم نووسی بە سەد جۆر
ئەگەر چاک بوو لەلاتان
پێشکەش بە خاک و پاتان
ئەگەر خەراپە لاتان
ئێوە بن و خواتان
عەفو فەرموون نوقسانم
لەوە باشتر نازانم