ماف
لە کتێبی:
دیوانی عوسمان عوزێری
بەرهەمی:
عوسمان عوزێری (1936-1966)
2 خولەک
843 بینین
ئەی ماف تۆ وشەی سەردەمی گەلی
تەرازووی ڕاستی ڕۆژی ئەزەلی
هەوڵت بۆ ئەدەن لە هەموو جیهان
کە دەستگیری کەن بە پارە و ژیان
چونکە ئەو گەلەی تۆی تیا بڵاو بێت
وشەت لەباتی وشەی سڵاو بێت
ئەو گەلە وەک دار بەرز ئەبێتەوە
زۆردار لەناویا جێی نابێتەوە
هەموو بەختیار و دڵ پڕ لە هەستن
هەر وشە و ناوی تۆ ئەپەرستن
چونکە ئەگەر تۆ چوویتە هەر جێگا
گورگ و مەڕ بەجووت ئەڕۆن لە ڕێگا
چەن هەزار ڕۆڵە بە سەرمایەوە
لەبەر ناوی تۆ سەری نایەوە
بەڵام تۆی نەدی قەت بە خۆیەوە
ئەوە بوو بە زام لەسەر سۆیەوە
هەروەها گەلی کوردی بەشکراو
بێ تۆیە بۆیە کزە و بێ هەناو
چەن ڕۆڵەی جگەرگۆشەی هۆزی کورد
لەبەر ناوی تۆ بۆ زیندانیان برد
هەرچەندە ئەیوت ماف لەگەڵ بافتان
لە کوێن بۆ فریام، بۆ توونای چەفتان
لە دەنگی زنجیر زیاتر بەولاوە
هیچ کەس دیار نەبوو لە هیچ پەناوە
هیچ ماف ئێستا بە دەستی زۆردار
گیرۆدەی بەندە نەهاتۆتە دیار
بەڵام هەموومان وەک برووسکە و هەور
نرکە و نەعرتەی لێ ئەدەین بە جەور
گەر بە سەربڕین یان قەنارە و بەند
تۆ ڕزگار ئەکەین لە ئەڵقەی کەمەند
هەتا لە ئاسۆ مافمان لێ هەڵدێ
جووتیار و ڕەنجبەر ڕەنجیان وا ئەچێ
هیچ کات تێر ناخۆن لە بەری خۆکار
چونکە چییان کرد فڕاندی زۆردار
ئیتر تا هێزم تیا بێ بێ گەزاف
لە دوا هەناسەیش ئەڵێم کوانێ ماف