بنچینەی شادیت جە دڵ بەر ئاوەرد
لە کتێبی:
دیوانی مەولەوی
بەرهەمی:
مەولەوی (1806-1882)
1 خولەک
1260 بینین
بنچینەی شادیت جە دڵ بەر ئاوەرد
جە ڕای مۆڵەت دوور هەر چێوەت کەرد، کەرد
ئیسە ئەی تاڵی و قین گرتەت پەی چێش؟
ئەی تۆ بەستەی زام لابەردەت پەی چێش؟
باری ئەی مەینەت گرد نەوۆ کافی
تەمات زیاد کەرد جە بێئینسافی
تەرسی بێسامان زەحمەت جە لای من
جەوری دڵبەرەن مەنیەی نە ڕای من
هەڵای هەی ماچی گیرت نەوەردەن
بۆی شەمامەی ئێش عەشقت نەکەردەن
من دەردم پەیکار نازی دڵگیرەن
دەوای زامانم زامداریی تیرەن
بێشەرتیش دۆسی، قارش وەفامەن
مەزەی قین لەزەت، جەفاش سەفامەن
ئەر هەر سات دەردێ دەردێوتەر چەنی
بەیۆ، ماچوون ئاخ پەی دەردێو هەنی
ئامانەن، ئەر دیت باڵا عەرعەر تەرز
عەرز کەر نەک جارێ، وە سەد سۆزی بەرز
بەڵ دڵوەش کەرۆ مەینەت گازەکەش
زۆر دۆ وە بازووی غەمزە و نازەکەش
پەیاپەی پەیپەی نە دڵەی تەنگدا
هەر خەدەنگ بەرۆ وە جای خەدەنگدا