بابەتی١٦
کۆشش کردنی بەعزێ لە مەککە بۆ سوڵح
لە کتێبی:
بارانی ڕەحمەت
بەرهەمی:
مەلا عەبدولکەریمی مودەڕیس (1901-2005)
1 خولەک
684 بینین
وا لە نوبووەت تەواو بوو نۆ ساڵ
جا ئینجا بەعزێ لە ئەهلی کەماڵ
بۆ خزمەکانیان ڕەحمیان جۆشا
بۆ ئیسڵاحی بەین دڵیان خرۆشا
هەم لەو سەرەدا سەییدی غالیب
فەرمووی بە مامی بە ئەبووتالیب
ئەو پەیمان نامەی کە زوو نووسراوە
لە ماڵی کەعبە هەڵاوەسراوە
وەحی خودایی لەبۆم هاتووە
کرمی مۆرانە هەمووی خواردووە
مەگەر لەفزێکی کە موقەددەس بێ
عینوانی ناوی خودای ئەقدەس بێ
کە ئەمیە لێ بیست مامی بە تەکان
هات لەبۆ مەککە و فەرمووی بە خزمان
موحەممەد ئەڵێ ئەو پەیمان نامە
چونکە ئەساسی لەسەر حەرامە
هەمووی خوراوە مەگەر ناوی پاک
لەبەر حورمەتی خودای تەنیای تاک
بڕۆن لە کەعبە تەحقیقێ بکەن
ئەگەر وەها بوو تەسدیقی بکەن
ئیتر لابدەن لە ستەمکاری
دەست بەردار ببن لە دڵئازاری
حەیفە کە سیلەی ڕەحمی خزم و خوێش
ببٌی بە جەفا و جەور و سزا و ئێش
ئەگەر وا نەبوو من لەگەڵ ئێوەم
نادووم لەگەڵیا قەت بە دوو لێوەم
کە تاقێقیان کرد حاڵی بوون سەرجەم
واقیع وەها بوو، بێ زیاد و کەم