نیگارا چاوی مەستت عالەمی گێڕا بە مەخمووری
لە کتێبی:
دیوانی سابیری
بەرهەمی:
سابیری (1881-1944)
1 خولەک
549 بینین
نیگارا چاوی مەستت عالەمی گێڕا بە مەخمووری
وە هەم بەو چاوە بیمارە شیفایی دەرد و ڕەنجووری
شوعاعی مانگ و ڕوخسارت شکستی دا بە مانگ و خۆر
بە نووری حوسنی بێ چوونت کە تۆ سەر تا قەدەم نووری
بە ئاهـ و شیوەن و سۆزم بە چاوی سوور و ئاڵۆزم
وەها وێرانە خانەی دڵ نەما ئومێدی مەعمووری
گەدایی ئاستانت خۆشترە بۆ من لە پاشایی
بە ئومێدی کە ڕۆژێ پێ بەسەرما نێی و ڕابووری
وەرە ئەی دڵ قەڵاتەی بەندەگی شاهت لە گەردن کە
وەسیقەت تا نەبێ زەحمەت قەبووڵت کەن بە مەئمووری
لە قەول و فیعلی شەیتانی لە خوڵق و خوویی حەیوانی
موبەڕڕابە کە ئینسانی، چ نادانی و مەغرووری
جەراحاتی دەروونی سابیریناسناوی ئەدەبی ساڕێژ ئەبێ ڕۆژێ
کە تۆ دانێی یەدی بەیزا لە سەر سینەی وەکوو تووری