١٢
ب دەرکەتنا شەهریانە ب دەشتێ ژ بۆ سەیرانا سەرسال و گەشتێ
لە کتێبی:
مەم و زین
بەرهەمی:
ئەحمەدی خانی (1650-1707)
2 خولەک
1306 بینین
دەورا فەلەکێ ژ بەختێ فەیرۆز
دیسان کو نوما ژ نووڤە نەورۆز
مەبنی ل وی عادەتێ موبارەک
شەهری و سوپاهیان ب جارەک
با ژێر و کەلات و خانی بەردان
تەشبیهی ب نژدەیان و جەردان
سەف سەف دمەشینە کووهـ و دەشتان
ڕەف ڕەف دخشینە سەیر و گەشتان
ئەسنافێ ئومەم سغار و کوببار
قەتعا ڤەنەما د شەهری دەییار
هندەک ب پەیایی چوونە باغان
هندەک ب سواری چوونە راغان
هندەک ب تەبایی و ب کسرەت
هندەک ب هەڤالی و ب وەحدەت
ڕابوونەڤە خانم و خەواتین
وان ژی تژی گول کرن بەساتین
حووران کرە مەسکەنێ خوە جەننەت
بێ پەردە و بێ مەلال و مننەت
دۆشیزە و دوختەر و رەوالان
پاکیزە عوزار و زولف و خالان
ئەتراب و کەواعبێ د عەزرا
موردان و موراهقێ د زیبا
ئەسحابێ قوماشێ لوتفێ روخسار
ئەربابێ مەتاعێ حوسنێ دیدار
وان لێک دکرن مەتاعێ یێک عەرز
تەخمین دکرن ب طول و العرضعەرەبی
سوداگەرێ عشقێ بوون د بازار
هەم بائعێ حوسنێ هەم خەریدار
سەرسالی و باکر و رەوالان
سەدسالی و جوان و پیر و کالان
سەرسال ل رەسم و راهێ مەعهوود
گێڕان د جهـ و مەقامێ مەحموود