تێخ دووری دۆس جگەر تۆ کەردە
نامە بۆ مەفتوون
لە کتێبی:
دیوانی جەفایی
بەرهەمی:
جەفایی (1835-1890)
1 خولەک
536 بینین
تێخ دووری دۆس جگەر تۆ کەردە
هووناو زامان ڕیشەی دڵ بەردە
تەن لەت لەت وە سەیف ئەبرۆی ئەو دڵبەر
پێکیای پەیکان موژەی دڵ پەیکەر
«مەفتوون»ی مەعلوول عەین نەرگس بێز
مەحبووس زنجیر توڕڕەی موشک ڕێز
سەد هەزار حەسرەت پەی دڵ ئەوگاریت
ئاهـ سەرد و دەرد پەی زام کاریت
ئوستاد تەعلیم سەرمەدرەسەی عەشق
نە تەدبیر دەرد ئەوگاران پڕ مەشق
مەر نەوات سەییاد تێخ و تیر وە دەس:
دەخیل جە دەسش خەلاس مەبۆ کەس
مەکەرە گوزەر وە مەئوای ئەودا
چون دڵان جە لاش هان نە گرەودا
مەر نەدیت پەرێ غەزاڵەی موشکین
چەند ڕێزام وەتاو جە دیدە ئەسرین
کەردم وە نیشان دڵ پەرێ تیرش
سەر کەرد هوون چون سەیل نە جای تەئسیرش
ئیسە چەم بێ نوور دڵ زەدەی پڕ زام
سیوای ئێش و نێش نەیاوام وە کام
نەجاتت جەی دەرد ئەر هەن تەمەننا
بەڵ چون جەفاییناسناوی ئەدەبی نەشی وە فەنا
هاڵای حوسن ڕووی دیدەی دڵڕێشان
وە سەفحەی دڵدا سوورەت نەکێشان
چون تەبع کیتاب عەشق دڵداران
وێت لادەر نە بەزم پەری ڕوخساران
وەرنە جەو دما جە دەس سیاسەت
قەتعەن خەلاسیت تا ڕۆی قیامەت