لە من با دڵ وەکوو دنیا هەتا مەحشەر تەوەللا بێ
لە کتێبی:
دیوانی حەمدی
بەرهەمی:
حەمدی (1876-1936)
1 خولەک
714 بینین
لە من با دڵ وەکوو دنیا هەتا مەحشەر تەوەللا بێ
وەکوو مەجنوون دڵ و دنیا فیدایی چاوی لەیلا بێ
وەرە مەستانە بۆ گوڵشەن بە مەخمووری نیگاهێکە
بە کوێری چاوی نێرگس جا لەمەولا مەست و شەهلا بێ
بەیادی قامەتت دایم خەریکی ئەم خەیابانەم
لە جەولاندا ئەڵێم بەڵکە یەکێ هەمڕەنگی باڵا بێ
دەمی تۆ و غونچەیە ئەسبابی دڵتەنگی من و بولبول
کە یاری فەیز بەخشە هەر وەکوو گوڵ ئاڵ واڵا بێ
وەرە جانا بە تاریکی خەریکی خاتیمەی عەشقم
بەڕووتی ڕوومەتت بنوێنە با شەمعی موتالا بێ
بە سەهلی دەم لە ئەسراری دەمی نامەرد مەدە حەمدیناسناوی ئەدەبی
نەپشکووتوو کە نەبووە غونچە پڕ لوئلوئی لالا بێ