لە کونجی بێ کەسیدا شەو کە یادی وەسڵی تۆ سەرکەم
لە کتێبی:
دیوانی کەمالی
بەرهەمی:
کەمالی (1886-1974)
1 خولەک
511 بینین
لە کونجی بێ کەسیدا شەو کە یادی وەسڵی تۆ سەرکەم
لە خۆشی خۆشیا وەختە کە بفڕم باڵ و پەڕ دەرکەم
لە دەست تەعنەی ڕەقیبان مات و داماوم نییە چارەم
ئەبێ یا ئەرکی عەشقی ئەو بکەم یا هەردوو گوێم کەڕ کەم
موتاڵای خەتتی نەوڕەستەت بە من قەت ناکرێ گیانە
مەگەر عیلمی لەدوننی من بە جارێ حیفز و ئەزبەر کەم
ئەگەر بۆم دەست بدات ماچی دەمی تۆ ڕۆحی شیرینم
خەجاڵەت بم لە حەشرا گەر تەمەننای ئاوی کەوسەر کەم
دوو چاوم هەڵئەکۆڵم تا نەبینم تاقی ئەبرۆی تۆ
بە خۆڕایی دڵم بۆچ تووشی زەربەی شیر و خەنجەر کەم
مەحاڵ و سەعبە تەسخیری پەری ناکا بەنی ئادەم
کەمالیناسناوی ئەدەبی بۆ چی بێ جێ من تەمەننای وەسڵی دلبەر کەم