کە بۆ سەر موڵکی دڵ سەیری هوجوومی غەمزەکەی تۆم کرد
لە کتێبی:
دیوانی کەمالی
بەرهەمی:
کەمالی (1886-1974)
1 خولەک
282 بینین
کە بۆ سەر موڵکی دڵ سەیری هوجوومی غەمزەکەی تۆم کرد
نیگارا یادی جەوری جەیشی چەنگیز و هەلاکۆم کرد
کە خاڵ و پەرچەمی تۆم دی خەجاڵەت بووم وتم یا ڕەب
لە ناو باخا لەبەرچی سەیری سونبول بۆنی شەوبۆم کرد
لە خەوما جامی ئاوی کەوسەری دامێ پەری ڕوویێ
سبەی زوو هاتە دی شوکری خوا ماچی دەمی تۆم کرد
نەبوو حاڵی لە باسی ڕووی گەنم ڕەنگیی بتان زاهید
کەچی زوو حاڵی لێ هات هەرکە باسی خەپلەیی جۆم کرد
هەموو تاعات و نوێژم تێگەیشتم گیانی شیرینم
نەبوو مەقبووڵ هەتاکوو سوجدەیی میحرابی ئەبرۆم کرد
تەماشاکە کەمالیناسناوی ئەدەبی من نییە فەرقم لەگەڵ فەرهاد
وەکوو ئەو بێستوونی کەند منیش وا قەلعی شاهۆم کرد