امر نمودن سلطان اماره به هجوم لشکر

لە کتێبی:
کۆمەڵەی شیعری فەقێ قادری هەمەوەند
بەرهەمی:
فەقێ قادری هەمەوەند (1830-1890)
 2 خولەک  612 بینین
جۆش ئاوەرد نە دڵ ئەممارەی لەعین
ئەمرش جاری کەرد بە سوپای پڕ کین
ئەمرش کەرد بە قەلب مەیمەنە و یەسار
کەردشان هوجووم سوپا بە یەک بار
بە قووە هوجووم سوپای کوفر و کین
سەردار کەردن دوور جە قورب لەعین
خێزا جە زەمین زەلزەلەی نشوور
خورشید جە سایەی جەناح بی مەستوور
وەزیر کامیل قاو کەرد بە سوپا
ئاوەردن ییرش پەرێ ڕەزمگا
سوپای تەرەفەین کێشان بەیداخان
خێزا هەیاهەی نامەی قۆچاخان
ئاتەش دان بە تیپ تۆپ قومپاران
سەرڕێزا چون بەرگ خەزان جە داران
جە ئەبر حەربە خوون وێنەی مەتەر
گوڵگوون کەرد سەفحەی سەحرا و دەشت و دەر
چەند سەردار سەرگوم عەرسەی خەتەر بی
مەواتی هەرگیز جە مادەر نەبی
جەنگی جەوانان نە پەی نەنگ ونام
قەدقەد بین بە سەف ئەجەل جە ناکام
چەند تەهەمتەنان مەیووس بین جە سەر
چەند سەروەر بەری جە تاج و ئەفسەر
ئەسپان بێ ساحێب، مەردان بێ فەرەس
چون ڕۆی قیامەت کەس نەبی بە کەس
سەر وتەن هەر یەن کەفت نە ڕووی سەحرا
نمەند ڕای فەرەس کەرۆ گوزارا
ئەلحاسڵ ئەو ڕۆژ تا قورب غورووب
حەربە نە کار بی بە جەنگ مەغلووب
دان نە تەپڵکووس بۆڕییەن ئاسایش
عەودەت کەرد سوپا هەریەک بە جای وێش
سوپای تەرەفەین چەنی مەجرووحان
هەرکەس جە خەیمەی وێشان بین ئیسکان
زایەڵەی شیوەن دەوریەی سوپا
زەمین زەبوون کەرد سەردا جە سەما
چون خورشید نە بورج مەشریق کەرد تلووع
تەرەفەین پەی دەفن مەقتوول کەرد شرووع
وەیتەور نۆشابێن جە یەک زەرب دەست
هەنی تەرەفەین جەنگ نەکەردن قەست