amir nimudin siltan amarh bih hicum lişkir
Li pirtûka:
Komele Şîrî Feqê Qadirî Hemewend
Berhema:
Feqê Qadrî Hemewend (1830-1890)
2 Xulek
807 Dîtin
coş awerd ne dił emmarey le’în
emirş carî kerd be supay piř kîn
emirş kerd be qelb meymene û yesar
kerdişan hucûm supa be yek bar
be quwe hucûm supay kufir û kîn
serdar kerdin dûr ce qurb le’în
xêza ce zemîn zelzeley nişûr
xurşîd ce sayey cenaḧ bî mestûr
wezîr kamîl qaw kerd be supa
awerdin yîrş perê řezmiga
supay terefeyn kêşan beydaxan
xêza heyahey namey qoçaxan
ateş dan be tîp top qumparan
serřêza çun berg xezan ce daran
ce ebir ḧerbe xûn wêney meter
gułgûn kerd sefḧey seḧra û deşt û der
çend serdar sergum ’ersey xeter bî
mewatî hergîz ce mader nebî
cengî cewanan ne pey neng winam
qedqed bîn be sef ecel ce nakam
çend tehemtenan meyûs bîn ce ser
çend serwer berî ce tac û efser
espan bê saḧêb, merdan bê feres
çun řoy qyamet kes nebî be kes
ser witen her yen kefit ne řûy seḧra
nimend řay feres kero guzara
elḧasił ew řoj ta qurb ẍurûb
ḧerbe ne kar bî be ceng meẍlûb
dan ne tepłikûs bořîyen asayş
’ewdet kerd supa heryek be cay wêş
supay terefeyn çenî mecrûḧan
herkes ce xeymey wêşan bîn îskan
zayełey şîwen dewryey supa
zemîn zebûn kerd serda ce sema
çun xurşîd ne burc meşrîq kerd tilû’
terefeyn pey defin meqtûl kerd şirû’
weytewr noşabên ce yek zerb dest
henî terefeyn ceng nekerdin qest