جواب نامه سلطان به وزیر

لە کتێبی:
کۆمەڵەی شیعری فەقێ قادری هەمەوەند
بەرهەمی:
فەقێ قادری هەمەوەند (1830-1890)
 2 خولەک  544 بینین
فەرما بە مونشی شای هومایوون فال:
بنووس پەی وەزیر حەمیدە خیسال
ئەووەڵ حەمد و شوکر حەق بکەر ئەدا
حەق کەردەن پەی من تۆ بە ڕەهنوما
پادشاهیی من بە تۆن بەرقەرار
هەر تۆنی پەی من هەردەم مەدەدکار
ئافەرینت بۆ هەردەم بێ حیساب
مەمنوونم کەردی بەی ڕەئیی سەواب
هەرچی مەیلت بۆ، هەرچی ڕەزاتەن
سوپا و خەزانم توفەیل ڕاتەن
ئەر کەردی تەسخیر ئەو مەرز و ئەو بووم
شکست دای بە نەفس مەجازیی زەلووم
وێت بنیش نەو موڵک توحفەی دڵپەزیر
ئازاد کەر جە بەند سوڵتان زەمیر
بەتاڵ کەر نەو موڵک موفسیدەی ئەفسوون
ئاتەش دەر وە بەند سەفینەی قانوون
مەحیا کەر نە دڵ نوور سەرمەدی
ڕەواج دەر ئەحکام دین ئەحمەدی
خەزێنەی خەیاڵ پڕ کەر نە تەوحید
تەحریق کەر بە نار خەتەرەی پەلید
مەزڵەمەی ئیبلیس قەڵبش کەردەن تەنگ
سەرای هومایوون زەمیر کەردەن زەنگ
بە کەفلەمەی شەوق حوجرەش کەر تەجدید
سەیقەلنوما کەر بە قووەی تەحمید
دیدەش بە شوعلەی ئیمان کەر ڕەوشەن
حیفزش کەر نە شەڕ هەر فیتنەی فیتەن
هەر وەقت شاهـ دڵ نە تەخت کەرد جلووس
تۆ چەنی سەردار حەقیق بە مەخسووس
هەردوو حازر بان نە پای تەخت ئەو
غافڵش نەکەن هەم روز و هەم شەو
ڕەواج دەن بە حوکم شای والا نگین
تا موڵک ئەعزاش مەیۆ بە تەسکین
هەردوو چون مەهدی و مەسیح خورووج کەن
شام کوفر بە سوبح ئیمان کەن ڕەوشەن
های دەروێش ئەحواڵ سوڵتان زەمیر
سەردان جە ئەملاک عوسمانلیی فەقیر
سوڵتانش مەحبووس بەند قانوونەن
تەبەعەش نە ئەحکام عورفی زەبوونەن
هەر بە لوتف وێش زات سەمەدی
زاهر کۆ ئینعام مەسیح و مەهدی
وەرنە دین پاماڵ، میللەت مەعدوومەن
عالەم گشت غەریق بەحر زەلوومەن
سا چون نامەی شا یاوا بە ئەنجام
سپەر بە ساعی دەوەندەی تێزگام
ڕوان بی ساعی بە تاو و تەعجیل
نامەش دا بە دەست وەزیر کامیل