آگاه یافتن الخناس از آمدن سردار

لە کتێبی:
کۆمەڵەی شیعری فەقێ قادری هەمەوەند
بەرهەمی:
فەقێ قادری هەمەوەند (1830-1890)
 2 خولەک  496 بینین
ئەلخەنناس جە حاڵ سوپا بی ئاگا
دەر لەحزە عەرزە ئینشا کەرد پەی شا
ها جە موڵک شەرع سوپای بێ شومار
ئامان بە ئیمداد وەزیر ئەفگار
عیشق ماجازی سوپەهسالارەن
ساحێب تاج و تەخت، هەم نامدارەن
ئێدەن وەزیفەی بەندەی جان فیدات
موتتەلیع کەم شاهـ جە هەر واقیعات
عەرزەش کەرد تەمهیر سپەرد بە قاسید
قاسید کۆتا کەرد تەریق بەعید
عەرزە تەقدیم کەرد بە حوزوور شاهـ
ئەمرش کەرد دەبیر عەریزەش وانا
سوڵتان بێباک نەفس ئەهرەمەن
جە ئەندێشەی کار سازا ئەنجوومەن
ئەمرش کەرد وانان عەریزەی سەردار
ڕەئیش تەڵەب کەرد جە ئوموور کار
سەرهەنگان هەریەک ئامان بە جەواب
هەرکەس بە ڕەئیێ بەیان کەرد سەواب
جەودەم ئەزازیل وەزیر ئەولا
ئاشووبەی دەوران کەریهـ گومڕا
عەرز کەرد پادشام هەر ئێدەن تەدبیر
ڕەوان کەی سوپا بێ سەبر و تەئخیر
ئەر ڕوخسەت بەخشۆ وەنەم شەهریار
من مەشوو وە ڕەزم حەربەی کارزار
جە یومن و ئیقباڵ شای هومایوون فەڕ
سوپا و مەرز و بووم مەکەم موسەخخەر
شکۆفا دەردەم سوڵتان جە شادی
پەی جەمع سوپا کەردن مونادی
بە وەعدەی دە ڕۆز تەعجیل کەرد نە کار
جەم کەرد پەی وەزیر سوپای بێ شومار
یازدەهەم وەزیر بە تەعجیل و تاب
ڕەوان بی چەنی سوپای بێ حیساب
ئیبلیس ها نە ڕای وێش مەکۆ گوزەر
جە هەردوو ئۆردوو تۆ بشنەو خەبەر