ئاگاداری میرچراغ لە حاڵی زاری ئەحمەد و بردنی ئەو بۆ گوندی وەندی
لە کتێبی:
لاس و خەزاڵ (فیدایی)
بەرهەمی:
مەلا کەریم فیدایی (1928-1993)
1 خولەک
800 بینین
ئەو لاوە کە تاڵ ئەبوو ژیانی
مامی بە هەواڵەکەی دەزانی
تاکوو نەخوا خەمێ لە بۆیان
ئەویان دەبردە گوندی خۆیان
مەجنوونی بە بیروباوەڕ و ڕوون
دەی دی کە لەوەندە ڕوویی بەیبوون
چل هێندەیی دیکە موبتەلا بوو
لەو خاکە بە عیشق ئاشنا بوو
گیراوە دڵی بە موویی زوڵفی
بەسراوە ملی بە داو و قڵفی
گیرۆدە دەبوو بە موویی پەرچەم
سووتا بە گڕ و بڵێسە وەک شەم
پەروانە و شەم دەبوون کە جووتە
شاباڵی بە ئاوری دەسووتا
ویستی کەوە بووکی وەندە بێنێ
لەو دێیە دەسی لە مل وەرێنێ
بەو حاڵە لە گوندی وەندی ماوە
باڵایی لەبن غەما چەماوە