وڵامی نامەی شێخ عەلاوەین
لە کتێبی:
دیوانی ئەمین ئوشنوویی
بەرهەمی:
ئەمین ئوشنوویی (1889-1954)
1 خولەک
719 بینین
گوڵی باغی کەماڵەدین، فیدایی چاوەکانت بم
جگەرگۆشەی جەلالەدین بە قوربانی مەکانت بم
هەمێشە مونتەزیر بۆ هیممەتی تۆمە هەتا دەمرم
فیدایی خانەقاهـ و مەسجد و حوجرەی خەلانت بم
دوو سەد جارم زیارەت کرد لە شادی نامە و قاسید
بە قوربانی خەتی سەر کاغەز و ئیمزای جوانت بم
لە ڕوویی مەرحەمەت حاڵی منت پرسیبوو ئەی مەولا
فیدایی لەفزی خۆش و شەککەرین شیرین زوبانت بم
ئەگەر خالق بکا قسمەت بەهارێ نییەتم وایە
دەگەڵ یار و ڕەفیقان بێمە خزمەت مێهمانت بم
بە نووری شەمعی ڕوخسارت بکەم ڕۆشن شەوی تارم
لە دەرکی خانەقات هەر شەو وەکوو سەگ پاسەوانت بم
«ئەمینناسناوی ئەدەبی» حەڵقە بە گۆشی خانەدانی هادییەددینە
لە ڕۆژی مەحشەرێ مەولا لە زومرەی خادمانت بم