وەڵام

گیانە نامەکەت..
نامەی سەرکۆنە و کاری زامەکەت
بەدڵ خوێندمەوە پتر لە جارێ
نمە فرمێسکم بۆی کەوتە خوارێ
جۆشی سکاڵای ناخی دەروونت
دڵداری ڕوونت..
پاڵی پێوەنام
تا دەربڕم هۆی قوڵی و کوڵی زام
سەرکۆنەم مەکە تاکە نازدارم
بۆ دەرنەبڕینی وتەی تەڕ شیرین
وتەی ناسک و پڕ سۆزی دێرین
جا دڵنیابە..
چاک دڵنیابە، خۆشەویستەکەم
شەیداکەی دوێنێ و تۆ پەرستەکەم
بەڵام گیانەکەم
ئەوەی ئەبیستم، هەرچی ئەبینم
ئەوەی تووشی بووم
ئەی گۆشتێ تەن و دەماری ژینم
ناچاری کردووم..
لەجیاتی ووشەی پڕ (خۆشەویستی)
یادی ڕابردوو ڕۆژانی مەستی
وشەی (پەرستن)
( ئەندێشە سوین لە لەشی کوشتن)
چەند وشەیەکن ترسناک مەبەست
(نەڕە) و (زرمە) بە هەر (دەنگ و تەقە)
هەر باسی (ڕاستی) و(هەڵە) و ڕێ ی (هەقە)
(بڕین و دڕین)، (مردن و گریان)
ڕێچکەی هاتووچۆ بۆ سەر کوردستان
وشەی (کوشتن) و (ئاگرە و ئاسن)
مێشک و دڵ و گوێ لەوانە کاسن
بۆیە گیانەکەم، چیت بۆ بنووسم؟
ئەو سروشانە بۆ من هەوێن بن
یەک لە یەک پتر وا دڵتەزێن بن
چیت بۆ هەڵبەستم..؟
چۆن ئاودێری کەم بە سۆز و هەستم
بێمەوە دۆخی وەک هەرزەکاریم؟
لەبیر کەم هەستی نەتەوایەتیم؟
بیخەمە ئەولا گشت کوردایەتیم؟
لەپێناو تامی کۆستی دڵداریم..!!
زۆر چاک بزانە من گۆشت و خوێنم
چۆن تۆ پەرست بم مەرگیش بدوێنم؟!
خۆ (ئەمۆنیا) نیم..!
ماوەی چرکەیەک ببمە ئاوو گاز
لەژینی خۆشم زۆر دڵنیا نیم
تا دەست لەمل بین لەباخی مراز
ئازیز من لاوم:
جەزرەبە و دواوێ کە تێی ئاڵاوم
یا ئەو دەردانەی گەل گیرۆدەی بوون
ئەمانبەن بەرەو گۆڕی لەناوچوون
پێویستی زۆرە! بە یارمەتی تۆش
لەگەڵما وەرە، دڵت بێنە جۆش
نەک بۆ مەبەستی وشەی (دڵداری)
بۆ ڕابواردن یا بۆ گریە و زاری
بەڵکوو بۆ (خەبات)
با خۆشەویستی..
وەک مەشخەڵ بێ بۆ ڕزگاری ووڵات
دەس لەناو دەس بێ
سەرکۆنەم مەکە، ئیتر با بەس بێ
شادی و بەختیاری گەل و نیشتمان
با بێتە بەری ڕەنجی تێکۆشان.